Әдебиет сыншысы, жазушы, Халықаралық «Алаш» әдеби сыйлығының иегері Құлбек Ергөбек 70 жаста. Отырар ауданында дүниеге келген мерейтой иесімен жерлестері кездесу өткізді. Басқосуға зиялы қауым өкілдері қатысты. Олар қазақ әдебиетінің жанашыры жайында ой пікірлерін ортаға салып, туындыларын талқылады.
Жазушы-публицист, филология ғылымының докторы, профессор Құлбек Ергөбектің қазақ әдебиетіне сіңірген еңбегі өлшеусіз. Жиынға келген зиялы қауым өкілдерінің пікірі осыған саяды. Ғалым алдымен өз өмірінің түрлі белестері жайлы сөз қозғады. Сондай-ақ кездесуде студенттер баяндама оқып, сұрақтарына тұшымды жауап алды.
Автор бүгінге дейін 60-қа жуық кітап шығарды. «Арыстар мен ағыстар» атты бес томдық туындысы тағы бар. Ғалымның шоқтығы биік «Жан жылуы», «Мейірім шуағы», «Жазушы шеберханасы» сынды кітаптары оқырман тарапынан жоғары баға алған. Ал, шығармалары орыс, түрік, өзбек, қырғыз, ұйғыр тілдеріне аударылып басылған.
Бас қосуда Ергөбектің еңбегі жайлы, жақсы қасиеттері туралы да айтылды. Құттықтау сөздер жеткізіліп, марапаттарға кенелді. Отырар ауданының Түркістандағы мәдени күндеріне тұспа-тұс келген мерей тойда замандастары құттықтап, алғысын білдірді
