Түркістан облысының Қоғамдық даму басқармасына қарасты «Жастар ресурстық орталығы» КММ-нің ұйымдастыруымен жастар арасында келеңсіз жағдайлар мен жат қылықтардың алдын алу, ойынқұмарлықтың (лудоманияның) зияны туралы түсіндіру және психологиялық көмек көрсету мақсатында Шардара ауданы №16 колледж студенттеріне арналған семинар-тренинг өткізілді. Шара «Лудомания – ғасыр дерті» тақырыбында өтті.
Семинар-тренингке педагогика ғылымдарының профессоры Р. Әбдіразаққызы және Жастар ресурстық орталығының әдіскері Е. Әбдірахманова арнайы шақырылып, жастармен ашық пікір алмасу жүргізді.
Іс-шара барысында лудомания ұғымы, оның психологиялық, әлеуметтік және құқықтық салдарлары туралы кеңінен түсіндірілді. Қатысушыларға бұл дерттің адамның тұлғалық дамуына, отбасылық қарым-қатынасына және болашақ өміріне келтіретін зияны нақты мысалдар арқылы жеткізілді.
Семинар қатысушыларына ойынқұмарлыққа бейім мінез-құлықтың алғашқы белгілерін тану, ондай жағдайлардың алдын алу, өз-өзіне сенімділікті арттыру және бос уақытты тиімді пайдалану жолдары бойынша практикалық кеңестер берілді. Сонымен қатар, студенттерге арнап психологиялық жаттығулар мен тренингтер ұйымдастырылып, белсенді қатысуға мүмкіндік берілді.
Аталған іс-шара жастар арасында жауапкершілік сезімін арттыруға, салауатты өмір салтын насихаттауға және тәуелділікпен күресудің тиімді жолдарын меңгеруге бағытталды.
