Елімізде саяси партиялардың сайлауалды үгіт-насихат жұмыстары қарқын алып, өңірлердегі сайлаушылармен кездесулердің географиясы кеңейіп келеді. Кандидаттардың кездесулері қалалар мен ауылдарда ғана емес, өндіріс орындарында, түрлі мекемелерде, оқу орындарында және қоғамдық көліктерде де ұйымдастырылуда. Осылайша қоғамдық кеңістіктер тұрғындармен тікелей пікір алмасудың тиімді алаңына айналып отыр.
Партиялар сайлаушылармен өзара іс-қимылдың әртүрлі тәсілдерін қолданғанымен, олардың күн тәртібінде өңірлерді дамыту, өнеркәсіп пен кәсіпкерлікті қолдау, жұмыспен қамту, білім беру, әлеуметтік саясат, экология және инфрақұрылымды жетілдіру мәселелері негізгі орын алуда.
«Әділет» партиясы «Әділетті Қазақстан үшін» мобильді керуені аясында бірқатар өңірлерде көшпелі кездесулер өткізді. Жетісу облысында қоғамдық бірлік пен тұрғындармен өзара байланысты нығайтуға бағытталған «Әділет желкені» акциясы ұйымдастырылды. Сонымен қатар партия атынан Құрылтай депутаттығына кандидат Екатерина Смышляева сайлауалды бағдарламаның негізгі бағыттарын түсіндіретін қысқа бейнероликтер топтамасын бастады. Павлодар қаласында партия кандидаттары қоғамдық көлікте тұрғындармен жүздессе, Маңғыстау облысында еңбек ұжымдары, мұнай-газ және балық шаруашылығы саласының қызметкерлері, теңіз сервистік компанияларының өкілдері, кәсіподақ мүшелері және өндіріс ардагерлерімен кездесулер өткізді. Кездесулер барысында еңбек қауіпсіздігі, өндірістік және порт инфрақұрылымын жаңғырту, Транскаспий халықаралық көлік бағытын дамыту, кадр даярлау, цифрлық экономика, Каспий теңізінің экожүйесін сақтау және жастарды жұмыспен қамту мәселелері талқыланды.
Жалпыұлттық социал-демократиялық партия (ЖСДП) Ақмола және Қарағанды облыстарында сайлаушылармен кездесулер ұйымдастырды. Көкшетауда еңбек ұжымдарымен еңбек жағдайы, жалақы деңгейі, әлеуметтік кепілдіктер және өңірлік экономиканы дамыту мәселелері қаралды. Қарағандыда білім беру, әлеуметтік қорғау, жер қатынастары және тең мүмкіндіктер тақырыптары талқыланды. Сонымен қатар Алматыдағы футбол матчында партия рәміздері бейнеленген киімдегі азаматтың қоғамдық тәртіпті бұзу фактісі ақпараттық кеңістікте кеңінен талқыланып, құқық қорғау органдары әкімшілік іс қозғағаны хабарланды.
«Байтақ» партиясы өңірлердегі кездесулерінде экологиялық мәселелерге басымдық берді. Таразда студенттермен табиғи ресурстарды тиімді пайдалану және «жасыл» экономиканы дамыту мәселелері талқыланса, Ақтөбеде ауыз су сапасы мен қалалық ортаны көгалдандыру мәселелері көтерілді. Шығыс Қазақстан облысында самырсын ормандарын сақтау, Алматы облысында апорт өсірушілерді қолдау, ал Жамбыл облысында суару жүйесі, абаттандыру, қалдықтарды бөлек жинау және электрмен жабдықтау мәселелері күн тәртібіне шықты.
Қазақстан халық партиясы (ҚХП) Алматы қаласында тұрғындармен ашық кездесуді мәдени бағдарламамен ұштастырған «Мәңгілік классика» акциясын өткізді. Сонымен қатар партия Respublica және «Ақ жол» партияларының кеңселері маңында сайлауалды бағдарламасының негізгі бағыттарын таныстырды. Партия өкілдері бірқатар әлеуметтік бастамалар бойынша өз ұстанымдарын білдіріп, саяси пікірталасқа қатысты мәлімдемелер жасады. Бұдан бөлек, партия бастамасымен еліміздің жиырма қаласында «Кәне, құшақтасайық!» акциясы ұйымдастырылды.
«Ауыл» партиясы сайлауалды кездесулерінде өңірлерді кешенді дамыту мәселелеріне басымдық берді. Қосшы қаласында өткен кездесуде жаңа мектептер салу, денсаулық сақтау, мәдениет, спорт және инженерлік инфрақұрылымды дамыту мәселелері көтерілді. Батыс Қазақстан облысында партия активімен кездесу өткізіліп, сайлауалды науқанның міндеттері талқыланды. Сонымен қатар кандидат Қарақат Әбден ұлттық дәстүрлер мен отбасы құндылықтарын насихаттауға бағытталған іс-шараға қатысты.
«Ақ жол» демократиялық партиясы кәсіпкерлермен және өндіріс орындарының ұжымдарымен кездесулерін жалғастырды. Көкшетауда өндіріс кәсіпорындарында отандық өндірісті қолдау, ауыл шаруашылығы машина жасауы, шағын және орта бизнес, жұмыспен қамту, инфляция, міндетті әлеуметтік медициналық сақтандыру және зейнетақы жүйесіне қатысты мәселелер талқыланды. Сонымен қатар партия өкілдері Көкшетаудағы сүт зауытының жұмысымен танысты. Алматы қаласында кандидаттар «Magnum» ЖШС ұжымымен кездесіп, сайлауалды бағдарламаның негізгі бағыттарын таныстырды. Сондай-ақ партия «Өзгерістер жолы» онлайн-жобасын іске қосып, азаматтардың ұсыныстарын жинауға бағытталған қоғамдық бастаманы жүзеге асыруда.
Respublica партиясы өндіріс орындары мен жастар аудиториясымен кездесулерге басымдық берді. Партия кандидаттары бірқатар кәсіпорындардың еңбек ұжымдарымен кадр даярлау, өңдеу өнеркәсібін дамыту, салық саясаты, кәсіпкерлікті қолдау және отандық өндірісті дамыту мәселелерін талқылады. Өскемен қаласында жастар кәсіпкерлігі мен креативті индустрияларға арналған форум өтті. Сонымен қатар партия атынан Құрылтай депутаттығына кандидат Маргарита Боярова Threads әлеуметтік желісі арқылы сайлауалды бағдарламаның негізгі бағыттарын түсіндіру жұмыстарын жалғастыруда.
Жалпы, сайлауалды үгіт-насихат науқаны еліміздің барлық өңірін қамтып отыр. Кездесулер өндіріс орындарында, білім беру ұйымдарында, қоғамдық кеңістіктерде және тұрғындармен ашық диалог форматында өтуде. Партиялардың өңірлік күн тәртібі негізінен өңірлерді дамыту, экономиканы қолдау, әлеуметтік саланы жетілдіру, экологиялық қауіпсіздікті қамтамасыз ету және халықтың өмір сүру сапасын арттыру мәселелеріне бағытталған.
