Энергетика министрінің өзі бағаны реттей алмайтындарын ашып айтты. М. Мырзағалиевтің айтуынша, бензин құны Брент маркалы мұнайға тәуелді емес. Сондай-ақ мердігерлер де өз бағасын бекітуге құқылы.
Бірақ жауапты ведомство отын тапшылығын болдырмау үшін бірқатар шара қабылдап жатыр екен. Айта кетерлігі, биыл елде дизель отынының тапшылығы орнап, оны көрші елдерден импорттауға тура келді. Салдарынан баға өсіп кетіп, отын тек талонмен ғана сатылған.
Мағзұм Мырзағалиев, ҚР Энергетика министрі:
«Баға бойынша қазір жүйелі өзгерістерді әзірлеп жатырмыз және ең маңыздысы мынада: біріншіден, қазір үш мұнай өңдеу зауытында жоспарлы және жоспардан тыс жөндеу жұмыстары жүргізіліп жатыр, олардың шарттарын анықтау керек. Екіншіден, материалдық-техникалық резерв базаны қалыптастыру; үшіншіден, жанар-жағармайды бақылау, әрбір мұнай базасында тиісті құрал-жабдықтармен жарақтандыру қажет».
Ал Ұлттық экономика министрінің айтуынша, келер жылы елде шамамен 88 миллион тонна мұнай өндіріледі. Сөйтіп қара алтынның бір баррелі 64,5 долларды құрайды. Ал, 2023 жылы бұл көрсеткіш 58 долларға дейін түсуі мүмкін. Осы болжамдарды ескерсек, мұнай секторынан бюджетке түсетін табыс көлемі 2 жарым триллион теңгеге жететін көрінеді.
