Redactor
Мемлекет басшысының соңғы Жолдауында аграрлық сектордың өнімділігін арттыру, су ресурстарын тиімді пайдалану және ауыл шаруашылығына заманауи технологияларды енгізу мәселелеріне ерекше назар аударылды. Бұл – еліміздің азық-түлік қауіпсіздігін нығайтып, ауыл тұрғындарының әл-ауқатын жақсартуға бағытталған маңызды қадам.
Менің ойымша, ауыл шаруашылығын қолдау тек субсидия бөлумен шектелмеуі керек. Ең бастысы – фермерлерге қолайлы жағдай жасау, өндіріс шығындарын азайту, өнімді өңдеу кәсіпорындарын дамыту және отандық өнімнің бәсекеге қабілеттілігін арттыру. Жасанды интеллект пен цифрлық технологияларды енгізу де шаруашылықтардың тиімділігін арттыруға мүмкіндік береді.
Әсіресе, Түркістан облысы үшін бұл бағыттың маңызы зор. Өңірдің ауыл шаруашылығындағы әлеуетін толық пайдалану үшін су үнемдеу технологияларын кеңінен енгізіп, мал шаруашылығын, жылыжай өндірісін және ауыл шаруашылығы өнімдерін терең өңдеуді дамыту қажет.
Мемлекеттік қолдау ашық әрі нақты нәтижеге бағытталса, шаруалардың өндірістік мүмкіндігі артып, жаңа жұмыс орындары ашылады. Ауылдағы кәсіпкерліктің дамуы – өңір экономикасының нығаюына тікелей ықпал ететін фактор.
Ауыл шаруашылығын дамыту – ауылдың ғана емес, тұтас елдің тұрақты дамуына салынған инвестиция.
