Redactor
Сайлауға бір аптадан аз уақыт қалғанда саяси партиялар өңірлердегі үгіт-насихат жұмыстарын жалғастырып, азаматтарды толғандыратын өзекті мәселелерді күн тәртібіне шығарды. 17 тамызда өткен кездесулер мен іс-шараларда жұмыспен қамту, экология, тұрғын үйдің қолжетімділігі, бизнесті қолдау және отандық өндірісті дамыту мәселелері кеңінен талқыланды.
«Әділет» партиясы сарапшылар қауымдастығына «111+ шешім» құжатын таныстырып, креативті индустрияларды дамыту, отандық өндірушілерді қолдау және жастарды жұмыспен қамту мәселелеріне назар аударды. ЖСДП өңір тұрғындарымен кездесулер өткізіп, сайлауалды бағдарламасын таныстыруды жалғастырды.
«Байтақ» партиясы экологиялық мәселелерді басты назарда ұстап, табиғатты қорғау, қалдықтарды қайта өңдеу, биоалуантүрлілікті сақтау және экотуризмді дамыту тақырыптарын көтерді.
Қазақстанның Халық партиясы еңбек құқықтары, әлеуметтік саясат, жұмыспен қамту және тұрғын үй мәселелерін талқылады. Ал «Ауыл» партиясы өндіріс, логистика, инфрақұрылымды жаңғырту және экологиялық акцияларға басымдық берді.
«Ақ жол» партиясы кәсіпкерлермен және еңбек ұжымдарымен кездесулерде бизнесті қаржыландыру, несиелеу, ипотекалық бағдарламалар мен баспананың қолжетімділігі мәселелерін көтерді. Respublica партиясы азық-түлік қауіпсіздігі, цифрландыру және отандық өндірісті қолдау бағытындағы ұсыныстарын таныстырды.
Осылайша, 17 тамыздағы сайлауалды күн тәртібі халықтың күнделікті өміріне тікелей әсер ететін мәселелерге арналды. Партиялар өз бағдарламаларын таныстырып қана қоймай, еңбек, экология, тұрғын үй және экономиканы дамыту бағытындағы басымдықтарын нақтылай түсті.
