Қазақстандық теннисші Елена Рыбакина Уимблдондағы турнирдің жартылай финалына шыққаны үшін қомақты жүлдеге ие болады, – деп хабарлайды Tengrinews.kz тілшісі
23 жастағы Рыбакина карьерасында алғаш рет “Үлкен дулыға” турнирінің 1/2 финалына шығып, аустралиялық Айлу Томляновичті жеңді. Бұл нәтиже қазақстандық спортшыға 535 мың фунт (шамамен 298 миллион теңге) табыс әкеледі.
Енді әлемнің экс-бірінші ракеткасы румыниялық Симон Халепті жеңген жағдайда жүлде екі есеге – 1 миллион 50 мың фунтқа (шамамен 585 миллион теңге) артады. Турнир чемпионы екі миллион фунт (миллиард теңгеден астам) ақша алады.
Айта кетейік, Рыбакинаның Халеппен жартылай финалдық матчі бүгін, 7 шілдеде Нұр-Сұлтан уақытымен 20.00-де басталады.
