Шардара қаласында 450-ге жуық оқушы Кеңес одағы кезіндегі құрылыс бригадаларының кеңсесі болған ескі ғимаратта оқуға мәжбүр. Оның өзі үлкен жолдың бойында орналасқан. Мектептің не спорт залы, не асханасы жоқ. Бірыңғай жылу жүйесі де орнатылмаған. Құлаудың аз-ақ алдында тұрған білім ордасы туралы тілшіміз баяндайды.
250 балаға лайықталған Шардарадағы бұл мектеп ғимаратында 450-ге тарта оқушы білім алуда. Жиһазы мен едені әбден тозығы жеткен сыныптар пешпен жылытылады, ал дәлізде мүлдем жылу жоқ.
Айнұр Ынтықбаева, мектеп директорының оқу ісі жөніндегі орынбасары:
«Шардара – Арыс» трассасының бойында орналасқан екі ғимаратта бөлініп оқимыз. Біздің ғимаратта асхана жоқ. Жылу іштен жанады. Су жүйесі жүргізілмеген. Ішкі әжетхана мүлдем қарастырылмаған».
Көне мектепке көрші ауылдардан қатынап оқитын оқушылар да бар. Кабинет жетпегендіктен, күн суықта тіпті дене шынықтыру пәндері де сыныпта өтеді.
Талғат Айтбаев, дене шынықтыру пәнінің мұғалімі:
«Денешынықтыру сабақтарын қазіргі қысқы мезгілде сыныптарда өткіземіз. Ұлттық ойынымыз тоғызқұмалақтан, шашка, шахмат, столдық жағдайларда сабақ өткіземіз. Күн жылынған кезде далада алаңшаларда өткізіледі».
Мәселені назарға алған жергілікті билік құлаудың сәл-ақ алдында тұрған мектептің жанынан жаңа ғимарат салып берді. Заман талабына сай бой көтерген нысанда қажетті пән кабинеттері де, асхана мен спорт залы да бар. Қазір іші жаңа жиһазбен толықтырылып, қажетті құрал-жабдықтар жеткізілуде. Салаға жауапты мамандар жаңа мектепке газ құбырлары тартылған соң, тапсырылатынын айтады.
Алмас Оспанов, Шардара аудандық құрылыс бөлімінің маманы:
«Соңғы бес жылда бес мектептің құрылысы жүргізілді. Алдағы жылдарға білім саласына үш мектептің жұмыс жобасы, проектісі дайын. Бюджетке, қаржыландырылуға өткізілген. Бүгінде Шардара ауданында апаттық жағдайдағы және үш аусымдық мектеп жоқ».
Ауданда келер жылы 600 орындық мектеп пен шаһардың орталығындағы білім ордасының жанынан 200 орындық қосымша ғимарат салынбақ. Ал, Шардарадан шалғай орналасқан Ұзын ата ауылында 200 орындық жаңа білім ошағы бой көтермек.
