Бокстан Дубайда өтіп жатқан жасөспірімдер мен жастар арасындағы Азия чемпионатында Қазақ елінің жас боксшылары өте жақсы өнер көрсетіп жатыр. Ағаларының Токиодағы сәтсіздігі «ашуландырған» болу керек, жас өрендеріміз нокаутпен жеңуді әдетке айналдырды десе болады.
Дубай төрінде 57 келіде Бахтияр Анарбаев Ирак өкілі Хуссейн Джассимді техникалық нокаутпен ұтса, 54 келіде сынға түскен Адайбек Ниязбай да қарсыласын мерзімінен бұрын еліне қайтарды. Ол сириялық Мұхаммедтен басым түсті. Сонымен бірге 50 келіде Илья Калинин ирактық Махди Махмудты техникалық нокаутпен жеңді. 48 келіде Санжар Тәшкенбай тәжік өрені Мехродж Зоидовтың мұрнын сындырып, жекпе-жек екінші раундта тоқтатылды. Тағы бір отандасымыз Дамир Дайпақов қырғыз Бекзат Ергешовты жеңді.
Қазақстанда бокс бар, ізбасарлар бар. Енді осы талантты жастарды олимп биігіне шығаратын жүйе мен қолдау қажет.
