Алексей Цой Денсаулық сақтау министрі қызметінен босатылды. Мемлекет басшысы Қасым-Жомарт Тоқаевтың жарлығы Ақордада жарияланды. Былтыр маусым айында елімізде коронавирус эпидемиясы өршіп, өлім-жітім жағдайлары көбейген кезде басшылыққа келген ол келе сала бірден жаңа қаулылар мен бұйықтар шығарды. Соның бірі — өткен жылдың қарашасынан бастап елімізде жыныс ауыстыруға рұқсат беруі. Тіпті ота «тегін» жасалады деген ақпар да тарады. Бұдан өзге, бас дәрігер қандай оқиғалармен елдің есінде қалды? Шынар Әділханқызының репортажы.
Пандемия кезінде елдің сынына ұшыраған денсаулық сақтау саласын игеріп әкету Алексей Цойға оңай болған жоқ. Алты жыл бойы денсаулық сақтау министрінің орынбасары болып келген ол былтыр 25 қарашада «жыныс ауыстыру» туралы бұйрыққа қол қойып, ел-жұртты дүр сілкіндірді. Абырой болғанда ел тағдырын ойлаған депутаттар министрді қолдай қоймады.
Бекболат Тілеухан, ҚР Мәжіліс депутаты:
«Балаларды зиянды ақпараттан қорғау барысында жыныстық азшылық топтың азғындығы, бір жынысты неке тәрізді құбыжық құбылыстан сақтайтын заңды нормаларды Парламентке енгізуді сұраймын».
Елімізде COVID-19-бен күрестің локдауннан басқа жолы болмады. Сосын Денсаулық сақтау министрі биыл 1 ақпаннан бастап республика бойынша жаппай вакцинациялауды бастап кетті.
Алексей Цой, экс денсаулық сақтау министрі:
«1 ақпаннан бастап вакцинация вакцинаның жеткізілуіне қарай кезең-кезеңімен жүргізіледі. Бірінші кезекте жұқпалы аурулар, медицина қызметкерлері екпе алады. 18 жасқа дейінгі балалар мен 65 жастан асқан адамға салынбайды».
Барлық медицина қызметкерлері Ресейлік «Спутник-V» екпесін қабылдағанда Цой QazCovid-in вакцинасын салдырды. Онысын отандық екпе елге қауіпсіз деп түсіндірді. Өз сөзінде ол, қыркүйекке дейін Қазақстанда 10 млн адам екпе алуы тиіс деген болатын. Алайда жоспар орындалған жоқ. Қыркүйекке дейін 6,5 млн азамат қана вакцина алды. Тоқаев сәуір айында Цойға вакциналау қарқыны төмен екенін ескерткен болатын.
Қасым-Жомарт Тоқаев, ҚР Президенті:
«Жұмысты жақсы бастадыңыз, кейін бәсеңдеп кеттіңіз. Сәуір айында жағдайды өзгертуіңіз керек. Әйтпесе, кадрлық ауысулар болуы мүмкін. Бұл сізге ұнамайтыны анық».
QazVac вакцинасын Дүниежүзілік денсаулық сақтау ұйымында тіркеу жұмысы созылып кетті. Цой министр боп тұрғанда бұл іс соңына дейін жеткізілген жоқ. Бас дәрігер жағдайды тұрақты баяндап отырса да, Мәжіліс төрағасы Цойды сынға алған еді. Ол елдегі жағдайды Еуропамен салыстырамын деп басы бәлеге қалды.
Нұрлан Нығматуллин, ҚР Парламенті Мәжілісінің төрағасы:
«Окоптан шығатын кез келді. Құрметті министр мырза, халықтың мұң-мұқтажын тыңдауға шығу керек. Адамдармен санитарлық дәрігердің қаулысы арқылы байланыс орнатуды қойыңыз. Ауруханаға барыңыз. Әсіресе, аудандық ауруханаға. Барыңыз да, қызмет көрсету сапасы мен қолжетімділіктің шын мәнінде қандай екенін көзбен көріңіз».
Сонымен, қызметінен кеткен денсаулық сақтау министрі не істемек? Бұл Бұл туралы Цойдың өзі әлеуметтік желіде «денсаулық сақтау саласын ғылыми жолмен дамытуға үлес қоспақпын» деп жазды. Мемлекет басшысы Цойды коронавирусқа қарсы күресте атқарған жұмысына алғыс айтып шығарып салды.
