Олимпиадалық резерв мектеп-интернатындағы оқушылар арасындағы әлімжеттікке қатысты оқу орнының директоры қызметінен қуылды. Ал Ақмола облысының спорт және денешынықтыру басқармасының басшысына қатаң сөгіс берілді.
Естіріңізге сала кетейік, Степногорск қаласындағы колледждің 8-сынып оқушысы өзінен кіші екі баланы ұрып, ақша талап еткен. Басқа оқушылар мұны бейнетаспаға түсіріп тұрған. Тексеріс кезінде мектеп директоры әлімжеттік көрсеткен балаларды оқудан шығарып жібергені анықталды. Алайда ол бұл туралы жауапты мекемелерге хабарламаған. Тексеріс жүргізілмеген. Қазір осы оқиғаға қатысты сотқа дейінгі тергеу жүріп жатыр.
Ермек Маржықпаев, Ақмола облысының әкімі:
«Бұл жерде тәрбие жұмысы дұрыс жүргізілмеген. Олимпиадалық резерв мектеп-интернат-колледжі директорын жұмыстан босату керек. Ал мектеп-интернат қарайтын облыстық Спорт және дене шынықтыру басқармасының басшысына қатаң сөгіс жариялаймын».
