Әңгіме олардың есебі төңірегінде басталды: онлайн бере ме, жоқ қағаз түрінде ме деп. Алайда депутаттар бірауздан онлайнға тоқталып отырған. Кенет Мәжіліс төрағасы дүрсе қоя берді. Неге? Нұрлан Сұлтанбек тарқатады.
Ұлттық экономика министрі «кәсіпкерлер тек онлайн есеп береді «деп айды аспанға бір-ақ шығарды. Тіпті бұл тапсырманы орындамағандарды жауап тартқысы келетінін де жасырмады. Сөйтіп еді, Мәжіліс төрағасы Нұрлан Нығматулин оған қарсы шықты. Және мәселенің байыбына бармай, үнсіз қолдап отыратын депутаттарды да сойып салды.
Нұрлан Нығматулин, ҚР Парламент Мәжілісінің төрағасы:
«Соны тек Парламентке келіп түсіндіңіз бе? Бүгін сіздер депутаттардың ұстанымын қолдап отырсыздар. Заң жобасы болса, оған келісесіздер, тез арада бәрін алып тастау керек болса, тек электронды түрін қалдырасыздар. Бұл қандай позиция? Кәсіпкерлердің мүддесін қорғамасаңыздар, қандай палатасыздар? Кеше сіз кәсіпкерлерге есеп жүргізуге мүмкіндік бермейтін әлсіз интернетті айтсаңыздар, бүгін бұл ұстанымды қолдап отырсыздар»
Жыр болған интернет ахуалын ескермеген депутат осылайша сынға ұшырады. Айтылған ұсыныс бірінші оқылымда мақұлданды. Бірақ халықты емес, халықаралық рейтингті көздеген позицияға түзетулер енгізіледі. Себебі ғаламтор түгілі,байланыс сымтеті дамымаған ауылдарды да ойлау керек.
Бүгінде елімізде 6341 ауыл интернетке қосылған, 768-інде – ол нашар, ал 1 178 ауыл – мүлдем интернетсіз. 2025 жылға дейін төмен орбиталық спутниктік жүйелер есебінен 1 178 ауылдың 617-сі байланыспен қамтылады. Қалған 600 ауылға ұялы байланыс пен оптикалық кабель түріндегі инфрақұрылым тартылады
Аталған жаңа ереженің өзіндік тиімділігі бар, – дейді министр Әсет Ерғалиев. Электронды есеп арқылы мемлекеттің кәсіпкерлерге деген сенімі артады екен.
Әсет Ерғалиев, ҚР Ұлттық экономика министрі:
«Өзара іс-қимылдың базалық қағидаттарын жетілдіру – кәсіпкерлік субъектілерінің мемлекетке сенімін және бизнес-ортаны реттеудің тиімділігін арттыруға мүмкіндік береді. Артық талаптардың өсуін болдырмау және тиімсіз талаптарды алып тастау мақсатында бизнеске қойылатын талаптарды белгілеу шарттары заңнамалық түрде айқындалатын болады».
Айтылған ескертуге сәйкес, заңға өзгеріс енгізілді. Енді қалай есеп беру – кәсіпкердің өз еркінде. Жеке кәсібі барлар келесі жылдың бірінші қаңтарынан бастап қағаз және электронды түрде өз қызметтері жайлы жауаптыларға мәлімет береді.
