2022 жылдан бастап зейнетақы жинағын алудың шекті мөлшері екі еседей артады. Яғни жиғаныңызды мақсатты жұмсағыңыз келсе, келесі жылдан бастап ойлап жүрген ақшаңызды ала алмай қалуыңыз әбден мүмкін. Жауаптылар бұл шешімге қатысты түсінік те берді. Айтуларынша, басты себеп әлеуметтік көрсеткіш мөлшерінің ұлғаюы екен. Алайда сарапшылар бұл билік тарапынан қабылданған «ең сәтсіз шешім» деген баға берген.
Зейнетақыға қатысты ақпар желіде желдей ескені сол екен халық дүрліге кетті. Солардың бірі – Гүлмира Жарылқасынқызы. 30 жылға жуық өмірін оқытушы саласына арнаған ол, бұл өзгеріске наразы. Себебі белгіленген қаржыны жинауым үшін 80-ге келгенше еңбек етуім керек пе дейді?
Гүлмира Әзіретбергенова, оқытушы:
«Зейнетақы жинағына жинаған ақшам 5 млнға жетпейді. Ол 2 еселенетін болса 7 млнның үстіне шығады. Ол 10 жылдан кейін инфляция болып тағы да көтеріледі. Былайша айтқанда бұл қарапайым халыққа, орта кірісі бар халыққа бұл ауыр тиеді. Демек, тұрғындардың қолы жете бермейді. Ондай жалақы алатын адам жоқ».
Сарапшы Мақсат Халық билік тарапынан қабылданған заң «ең сәтсіз шешім» дейді. Айтуынша, мемлекет бұл құжатты қабылдарда ешкімнің талқысына салмаған.
Мақсат Халық, сарапшы:
«Бұл мүлдем ешқандай қисынға келмейтін шешім деп есептеймін. Жалақылар өсіп жатыр деген уәжі бар. Бірақ шын мәнінде қарайтын болсақ, ең төменгі жалақының өзі 40 пайыз ғана өскен. Ал қазіргі бұл шектердің өсімі 80 пайыздың үстінде. Яғни 2 есеге өсті деуге негіз бар. Енді осы тұрғыдан қарайтын болсақ, ешқандай қисынға келмейді».
Қордағы артық ақшаны алуға қатысты жаңа заң 2022 жылдан басталады. Жауаптылардың жариялаған мәліметіне сенсек, 20 жастағылар – 3 млн 140 мың, орда бұзар кезеңде – 4 млн 370 мың қаржыңыз болуы керек. Ал 40 жаста зейнетақы қоры 5 млн 790 мың теңгеге толығуы тиіс. Ал 50-дегілердің қаржы қоры 40 пен салыстырғанда 1 жарым млн.ға жоғары. Зейнет жасындағылар болса, 9 млн 120 мың теңгеге тең.
Қаржыны алуға қатысты ақпарды талдап көрсек. Мәселен, 20 жастағы адамға белгіленген шекті сомма 3 млн 140 мыңға тең. Ол 18 жасынан жұмыс істеді делік. 2 жылда 3 млн теңгеден артық ақша жинау үшін айына 125 мың теңге жіберуі керек. Яғни, оның орташа табысы 1 млн 200 мың теңге болуы тиіс екен.
