Себебі үкімет келер жылдан бастап оның бағасын еркін айналымға жібермек. Яғни, бұған дейін мемлекеттен жұмыртқа өндірісіне беріліп келген субсидия тоқтайды. Соның кесірінен он жұмыртқаның бағасы 700 теңгеге жетуі мүмкін – дейді сарапшылар.
Қазір базарда бір жұмыртқа 45-теңге тұрады. Бұған дейін 35 теңгеден сатылып келген. Мемлекеттік қолдаудан қағылған кәсіпкерлер енді жұмыртқа бағасын екі есе көтеруге мәжбүр. Өйтпеске амал жоқ. Себебі, биыл жем-шөп пен жанармай қымбаттаған. Енді субсиядиясыз жұмыртқа 70 теңгеге бір-ақ жетуі мүмкін,- деген халық арасында гу-гу әңгіме тарауда.
Бахринса Әбубакирова, қала тұрғыны
«Қымбат қой қазір. Бірақ қыбат болса да аламыз, амал жоқ. Жеу керек. Қымбат деп алмай тағы қоя алмаймыз».
Әлия Байқонова, тұрғын:
«Бір лотогын 1200 теңге алып жүргенмін. Енді 1500 теңге боп кетіпті»
Базаркүл Төлешова 30 жылдан бері базарда сауда істейді. Оның айтуынша, екінші және үшінші сұрыптағы жұмыртқалар арзан болғандықтан, тезірек өтіп кетеді. Бірақ соңғы екі күнде тіпті солардың өзі күрт қымбаттаған.
Базаркүл Төлешова, сатушы:
«Жаз шыға ма бағаны түсіріп жібереді. Ал қыста көтеріледі. Фабрикаға барғанмен, ондай арзан бағаға ала алмаймыз. 10 қораптыың өзі 100 мыңнан асып кетеді. Әр жұмыртқаның үстіне әрі кетсе 3 тг қойып сатамыз».
Елдегі кейбір құс фабрикалары жабылудың сәл-ақ алдында тұр. Өйткені жұмысшыларды ұстап қалу мүмкін емес. Бұл жұмыртқа бағасының бұдан әрі шарықтауына әжептеуір әсер етеді. Тіпті, кейбір фабрикалар банкротқа ұшырауы да ғажап емес дейді сарапшылар.
Мақсат Халық, сарапшы
«Азаматтардың төлем қабілетіне кері әсер етеді. Азық-түліктің бағасы өткен жылмен салыстырғанда, 11,5%-ға өсіп отыр. Тағы өсетін болса, ол халықтың қалтасына үлкен соққы болайын деп тұр».
Ауыл шаруашылығы басқармасындағылар «субсидия өзін-өзі толық қамтамасыз ете алмай отырған тауарларға төлену керек», – дейді. Ал азық-түлік тек біздің елде ғана емес, бүкіл әлем нарығында қымбаттап отыр. Дүниежүзінде барлық тауар бағасы екі еседей өскен. Десе де, халықтың әл-ауқатына алаңдаған Мемлекет басшысы азық-түлік бағасының қымбаттауы мен және ауыл шаруашылығын субсидиялау мәселесін жүйелі түрде шешу қажет екенін ескертті.
Қасым-Жомарт Тоқаев, ҚР Президенті:
«Аталған ауылшаруашылық саласына қыруар қаржы бөлсек те, азық-түліктің басым бөлігін сырттан аламыз. Өзге елдер субсидияның не екенін де білмейді. Білсе де, дәл осындай мол қаржы бөлінбейді. Бір жағынан адамдарды босаңсытып жібердік, екінші жағынан сыбайлас жемқорлыққа жол беріп алдық».
Сондай-ақ, Президент Үкімет пен Ауыл шаруашылығы министріне бұл мәселемен түбегейлі айналысу керектігін айтып, міндет жүктеді.
