Мемлекет басшысы өзінің биылғы жолдауда ветеринарлардың жалақысын көтеріп, оларды жаңа жабдықтармен қамтамасыз етуді тапсырған болатын. Сонымен қатар денсаулық сақтау нысандарын салуға жеке инвесторлар тартуды жүктеген. Жолдауда көрсетілген басым бағыттар Түркістан облысында жүзеге асып келеді. Ветеринарларға автокөліктер беріліп, жеке қаржыға клиника салынып жатыр.
Түркістан облысында 1700 ветеринар еңбек етеді. Биыл жалақысы төмен болса да, иығына артылатын міндеті ауыр мамандық иелерінің жұмыс сапасын арттыру мақсатында бюджеттен қосымша 352 млн. теңге қаржы бөлінді. Бұл қаржыға 16 биопрепараттарды сақтауға арналған камералық тоңазытқыш, 178 витриналық тоңазытқыш, 814 термочемодан және 390 компьютер алынды. Енді облыстағы 16 ауданға автомобиль берілді. Сонымен қатар облыста «Ветеринариялық қызмет» мемлекеттік-коммуналдық кәсіпорыны құрылды.
Нұрбек Бадырақов, Түркістан облысы ауылшаруашылығы басқармасының басшысы:
«Ветеринария мамандары бұрындары 60 мың теңге төңірегінде айлық алып келсе, ветврачтар жалақысы қазіргі таңда 1,5 есеге дейін өсіп, 90-100 мың теңгеге дейін жыл 12 ай тоқтаусыз айлық алуға жағдай жасап отырмыз».
Сайрам ауданында 21 мың бас малды семіртуге арналған алаң салынып жатыр. Қайнарбұлақтағы нысанның аумағы 76 гектар. Сондай-ақ Түркістан облысында балаларға арналған жаялықтар шығаратын зауыт та іске қосылды. Қазақ және түрік бірлескен кәсіпорыны жылына 100 млн. дана жөргек шығарады. Өндіріс орнында 60 жаңа жұмыс орны ашылды. Жоба құны — 3 млрд. теңге. Одан бөлек Қарабұлақ ауылында медицина-сауықтыру орталығы ашылды. Жеке кәсіпкердің қаржысына салынған орталық 70 төсек-орынға лайықталған.
Өмірзақ Шөкеев, Түркістан облысының әкімі:
«Медицина саласына тартылған инвестиция көлемі күн санап артуда. Жекеменшік клиникалар Ордабасы ауданында, Кентауда, Шардара ауданында салынып жатыр. Медицина саласын дамытуға жан-жақты күш салынады».
Президент жолдауында көрсетілген мәселелер Түркістан облысында осындай нақты жұмыстармен шешімін тауып келеді.
