saqnews.kz
2025 жылғы 3 маусым күні Шардара ауданында жазғы демалыс кезеңінің басталуына орай, «Nur-delux» жағажайында шомылу маусымының салтанатты ашылуы өтті. Бұл бастама аудан әкімінің қолдауымен ұйымдастырылып, тұрғындар үшін естен кетпес мерекелік шараға айналды.
Ашылу рәсімінде аудан әкімі Арман Қарсыбаев құттықтау сөз сөйлеп, шараға қатысушыларды жазғы маусымның басталуымен құттықтады. Ол өз сөзінде тұрғындардың демалысы қауіпсіз әрі мазмұнды өтуі үшін барлық қажетті жағдайлар жасалғанын атап өтіп, судағы қауіпсіздік талаптарын қатаң сақтау қажеттігін ескертті.
Мерекелік шара аясында жағажай аумағында әртүрлі спорттық жарыстар ұйымдастырылды. Атап айтқанда:
Волейбол,
Футбол,
Арқан тарту,
Қошқар көтеру,
Гір тасын көтеру сынды ұлттық және спорттық бәсекелер өтті.
Сондай-ақ, отбасылар арасында ұйымдастырылған «Толағай» сайысы ерекше қызығушылық тудырып, көпшіліктің көңілінен шықты.
Кеш соңында аудандық мәдениет үйінің көркемөнерпаздар ұжымы мерекелік концерттік бағдарлама ұсынып, жиналған жұртшылыққа көтеріңкі көңіл-күй сыйлады.
Іс-шара барысында спорттық жарыстар мен отбасылық сайыстардың жеңімпаздары марапатталып, бағалы сыйлықтар табысталды.
Шардара ауданы әкімдігі тұрғындарды судағы қауіпсіздік ережелерін сақтауға және мәдениетті демалыс үлгісін ұстануға шақырады. Жазғы шомылу маусымы баршаңызға жайлы әрі жарқын әсерлерге толы болсын!
