Сарыағаш ауданының агроөнеркәсіптік әлеуетін арттыру бағытында жүзеге асып жатқан жобалардың бірі – Жібек Жолы ауылдық округіне қарасты Дихан баба елді мекенінде орналасқан “Jemisti Food” жауапкершілігі шектеулі серіктестігі. Аталған кәсіпорын тәулігіне 10 тонна сүт өнімін қайта өңдеуге қауқарлы. Қазіргі таңда кәсіпорында ұлттық өнімдер – сары май мен құрт өндірісі жолға қойылып, өңірлік нарықта отандық өнімге деген сұранысты қанағаттандыруға өз үлесін қосып отыр.
Аудан әкімі Арман Абдуллаев өндіріс орнына арнайы барып, кәсіпорынның тыныс-тіршілігімен танысты. Цех жұмысына жоғары баға берген аудан басшысы ұжыммен тілдесіп, сүт өнімдерін өңдеу саласындағы қол жеткізген жетістіктерімен құттықтады.
«Өңірлік өндіріс ошақтары – жергілікті экономиканың қозғаушы күші. Осындай кәсіпорындар арқылы біз ауыл шаруашылығын дамытып, тұрғындарды жұмыспен қамтуға және халықты сапалы, экологиялық таза өніммен қамтамасыз етуге жол ашамыз», – деді Арман Айдарұлы.
“Jemisti Food” ЖШС заманауи технологиялық құрал-жабдықтармен толық жабдықталған. Өндіріс процесінде сүт қабылдау, сүзгілеу, пастерлеу, май айыру, құрт престеу және кептіру сияқты бірнеше кезең қарастырылған. Бұл – өнім сапасының жоғары болуын қамтамасыз етіп қана қоймай, еңбек өнімділігін де арттырады.
Кәсіпорын қазіргі уақытта Қазығұрт және Сарыағаш аудандарының шаруаларынан күніне орта есеппен 4 тонна табиғи сүт жинап, оны өңдеп, дайын өнім ретінде жергілікті нарыққа шығаруда. Алдағы уақытта бұл көлемді екі есеге дейін арттыру көзделіп отыр. Серіктестік өнімдерін аудан орталығы мен көршілес өңірлердегі дүкендер мен базарларға тұрақты жеткізіп отырады. Ұлттық тағамдарды заманауи форматта ұсыну арқылы кәсіпорын жергілікті брендке айналуға ниетті.
Сонымен қатар, кәсіпорын жергілікті тұрғындарды жұмыспен қамту мәселесіне де айрықша көңіл бөлуде. Бүгінгі таңда мұнда 7 адам тұрақты түрде жұмыс істейді. Қызметкерлердің орташа жалақысы – 180 000 теңгені құрайды. Жұмысшылар үшін қолайлы жағдай жасалған: санитарлық талаптарға сай киім, асхана және демалыс бөлмелері қарастырылған.
Кәсіпорынның алдағы жоспары – өндірістік қуатты арттырып, жаңа өнім түрлерін шығару. Атап айтқанда, қаймақ, сүзбе, айран және йогурт өндіру жобалары қолға алынбақ. Бұл бағытта кәсіпорын мемлекеттік қолдау тетіктерін, оның ішінде жеңілдетілген несиелер мен субсидияларды тиімді пайдалануды жоспарлап отыр.
Сарыағаш ауданында ауыл шаруашылығы өнімдерін қайта өңдеуге арналған өндіріс орындарына жан-жақты қолдау көрсетілуде. Аудан әкімдігі тарапынан кәсіпкерлерге инженерлік-коммуникациялық инфрақұрылыммен қамтамасыз ету, заңгерлік және кеңес беру қызметтерін көрсету, өнім өткізу нарығына жол ашу бағытында жүйелі жұмыстар атқарылуда.