Сайлауалды науқан: партиялар өңірлердегі жұмысын күшейтіп, нақты уәделерге көшті
Сайлауға санаулы күндер қалғанда партиялар өңірлердегі үгіт-насихат жұмыстарын күшейтіп, тұрғындармен, еңбек ұжымдарымен және кәсіпкерлермен кездесулерін жалғастыруда. 17 тамыздағы күн тәртібінде жұмыспен қамту, отандық өндіріс, бизнес, баспана, денсаулық сақтау, инфрақұрылым және экология мәселелері басым болды.
«Әділет» партиясы сарапшыларға «111+ шешім» құжатын таныстырып, креативті индустриялар мен отандық өндірушілерді қолдау мәселелерін көтерді. ЖСДП Бурабайда тұрғындармен кездесу және флешмоб өткізді.
«Байтақ» экологиялық мәселелерге, табиғатты қорғау мен өңірлердегі кездесулерге басымдық берді. ҚХП еңбек құқықтары, жұмыспен қамту, баспана және әлеуметтік саясат мәселелерін талқылады.
«Ауыл» өндіріс, логистика және экология мәселелерін көтерсе, «Ақ жол» бизнеске қолдау көрсету, несиелеу, ипотека және баспананың қолжетімділігіне назар аударды. Respublica азық-түлік қауіпсіздігі, агроөнеркәсіп, цифрландыру және отандық өндірісті дамыту мәселелерін алға шығарды.
Осылайша, сайлау науқанының соңғы кезеңінде партиялар жалпы ұрандардан нақты ұсыныстарға көшіп, өңірлердегі азаматтардың өзекті мәселелерін шешуге бағытталған бағдарламалық басымдықтарын таныстыруда.
