2025 жылдың алғашқы жартыжылдығында Шардара ауданы ішкі саясат бөліміне қарасты Жастар ресурстық орталығы КММ-ның ұйымдастыруымен «Құмар ойын құрдымға апарады» тақырыбында жастармен ақпараттық-түсіндіру кездесуі өткізілді.
Іс-шараның негізгі мақсаты – жастар арасында құмар ойындарға тәуелділіктің алдын алу, зияндылығын түсіндіру және салауатты өмір салтын насихаттау болды. Кездесуге мектеп оқушылары, колледж студенттері және ерікті жастар тобы қатысты.
Кездесу барысында ойынқұмарлықтың белгілері, психологиялық және әлеуметтік салдары, тәуелділіктен арылудың жолдары кеңінен түсіндірілді. Жастарға нақты мысалдар келтіріліп, бұл дерттің адамның жеке өміріне, отбасына және қоршаған ортасына тигізетін зияны жан-жақты талқыланды.
Іс-шараға Жастар ресурстық орталығы КММ-ның басшысы М.Мусабеков қатысып, жастарға үндеу жасап, құмар ойынға қарсы күресте әрбір жастың өз жауапкершілігін сезінуі қажеттігін атап өтті:
«Құмар ойын – уақыт пен сананы жұтатын, болашаққа балта шабатын дерт. Бүгінгі жас — ертеңгі ел болашағы. Сондықтан сіздер өз болашағыңызды саналы түрде қалыптастырып, мұндай зиянды әдеттерден аулақ болғандарыңыз жөн», – деді ол.
Кездесу еркін пікір алмасу форматында өтіп, қатысушылар өз ойларын ортаға салды. Жастар тарапынан қойылған сұрақтарға мамандар тарапынан нақты әрі түсінікті жауаптар берілді.
Осындай бағыттағы шаралар алдағы уақытта да тұрақты түрде жалғасатын болады. Жастардың құмар ойындарға әуестігін болдырмау – қоғамның тұрақты дамуы үшін аса маңызды міндеттердің бірі.
Шардара ауданы ішкі саясат бөлімі
Жастар ресурстық орталығы КММ
