167 бас мал ұрланған қылмыстық топ ұсталды

Полиция қызметкерлері 167 бас мал ұрлаған қылмыстық топты ұстады. Тәртіп сақшыларының айтуынша, ұйымдасқан топ бес адамнан құралған. Оларды Семейде ұрланған 40 бас жылқыны айдап бара жатқан жерінде қолға түсірген. Арнайы операцияға Ішкі істер министрлігі Криминалдық полиция департаменті мен Павлодар облысының полиция департаментінің қызметкерлері қатысты. Сондай-ақ ұсталғандар Павлодар, Шығыс Қазақстан және Қарағанды облыстарында алты мал ұрлығын жасады деген күдікке ілінген. Тінту кезінде ұрланған тағы 67 жылқы, бір автокөлік және екі мотоцикл табылды. Нәтижесінде қылмыстық топқа қатысты Қылмыстық кодекстің 262-бабы, «Ұйымдасқан топ, қылмыстық ұйым құру және оларға басшылық ету, сол сияқты қатысу» бойынша қосымша қалмыстық істер қозғалып, мүлкін тәркілей отырып, 12 жылға дейін бас бостандығынан айыру жазасы қаралып отыр.