Мәдениет министрлігі Ұлттық Сурдлимпиада комитетін сотқа бермек

Мәдениет министрлігі Ұлттық Сурдлимпиада комитетін сотқа бермек. Өйткені комитет Бразилияда өтіп жатқан ойындарға баратын спортшылар тізімін алдын-ала келіспеген. Дау Еркебұлан Қанафин жеңіп алған алтын медальдан басталған. Сурдлимпиада комитеті Қазақстан заңнамасына қарамастан, өз тарапынан бірқатар спортшыларды, оның ішінде Еркебұлан Қанафинді жарысқа апарған. Алайда Бразилиядағы сараптама оның есту қабілетінде кінәрат жоқ екенін анықталыпты. Ол бұрын-соңды есту қабілеті бұзылған спортшылар арасындағы ресми жарыстарға қатыспаған. Ұлттық құрама командасының мүшесі емес және дене мүмкіндіктері шектеулі жандарға арналған спорт ұйымдарында тіркелмепті. Осыған қарамастан Ұлттық Сурдлимпиада комитеті спортшыны өз есебінен жарысқа жіберіп, Қазақстанның беделіне әлемдік спорт қоғамдастығының алдында нұқсан келтірді, дейді министрлік өкілдері.