Бейжіңдегі Қысқы олимпиададан Қазақстанның қоржыны бос қайтты. 34 спортшының бірде-біреуі үздік үштіктен көрінбегені қоғамның да Үкіметтің де тарапынан қатаң сыналуда. Қазақстан құрамасынан жүлдеге жақын болған жалғыз Абзал Әжғалиев болды. Шорт-трек шеберіне 30 000 доллар сыйақы берілмек. Дәл сондай төлем, оның бапкерлеріне де үлестіріледі. Жалпы, байрақты бәсекеге қатысқан спортшыларға 140 000 доллар бөлінеді деп күтілуде. Тәуелсіздік алғаннан бері үшінші рет Қазақстан құрамасы ақ ойындардан жүлдесіз оралды.
Қорыта айтсақ, Жалпыкомандалық есепте, Норвегия 16 алтын медальмен топ жарды. Екінші орынға 12 алтынмен германия тұрақтаса, үздік үштікті Қытай спортшылары түйіндеді. Кезекті рет допинг дауының астында қалған Ресей Олимпиада комитеті спортшылары 6 алтын медальмен 9-ы орынға табан тіреді.
