Базардағы азық-түліктің бағасы қымбаттамаса, арзандаған жоқ. Түркістандық тұрғындар осылай дейді. Күнделікті тұтынатын тауарлар төмен бағада сатылатын әлеуметтік дүкендер де халыққа қолжетімді емес. Өйткені, 200 мың халқы бар шаһарда бар-жоғы 13 қана сауда нүктесі бар.
Түркістан қаласында 13 әлеуметтік дүкен жұмыс істейді. Одан бөлек 5 сауда үйінде тұрғындар күнделікті тұтынатын тауар нарықтағыдан төмен бағада сатылып жатыр. Осы мақсатта 2022 жылы облыс қазынасынан 1млрд теңге бөлініпті.
Лаура Жанасбаева — «Түркістан» ӘКК АҚ департамент директоры:
«Қазіргі таңда тұрақтандыру қорының негізінде 10 мың тоннадан артық өнім көлемі бар. Яғни 960 миллионның үстінде. Оның ішінде «Айналым схемасы» шеңберінде 640 млн. теңге 4 мың кәсіпкерлік субъектілеріне қарыз ретінде таратылды және де 3700 тоннаның үстінде ол тұрақтандыру қорына сатып алу әдісі арқылы жүзеге асырылуда».
Әлеуметтік дүкендердің біріне бас сұқтық. 19 түрлі әлеуметтік азық түлік арзан бағада сатылып жатыр, көзіміз жетті. Мәселен картоп пен сәбіздің бір келісі мұнда 100 теңге, пияз 70, күріш 245, ұн 150, қант- 315 теңге тұрады. Ал, жұмыртқаның бір данасы — 34 теңге.
Гүлшат Тәліпқызы — қала тұрғыны:
«Бағалары өте тиімді, әрі дүкен тура үйіміздің қасында. Ыңғайлы. Тек осы жерден аламыз».
Миллиондарды тұрақтандыру қорына бөлудегі негізгі мақсат – базардағы бағаны түсіру. Нарықтың приинципі де сол әлеуметтік дүкендерде тауар арзан бағада сатылған соң, өзге сауда орындары азық-түлік құны амалсыз төмендетуі тиіс. Алайда, базардағы баға сол қалпы дейді жұрт. Әлеуметтік дүкендерде қолжетімді еместігін айтады. 200 мың халыққа бар жоғы 13 ғана.
БЛИЦСАУАЛНАМА:
— Азық-түлік өте қымбат. Арзандаған жоқ. Өткен күзде қандай бағамен сатып алсам, бүгін де дәл сол бағамен алып жатырмын.
— Әлеуметтік дүкендер жоқ біздің ауданда. Оны қай жерден іздеп жүреміз. Осы базарға келіп аламыз. Қымбат, амал жоқ.
Қала тұрғындарының айтуынша өткен жылмен салыстырғанда азық-түлік қымбаттамаса, арзандаған жоқ. Ал «Түркістан» әлеуметтік-кәсіпкерлік корпорациясы аталған мәселені шешу үшін әлеуметтік дүкендердің санын арттыруды жоспарлап отыр.
