Ақылы екпені ала алмаған азаматтар шет елге сабылуға мәжбүр. Себебі Дүниежүзілік денсаулық сақтау ұйымы мақұлдаған вакцина алу үшін қазақстандықтар көрші Қырғыз Республикасына, Өзбекстанға, тіпті Түркия асуға тура келеді. Өткен жылы Файзер вакцинасы ақылы салынады деген ақпарат желдей есіп еді. Бұл жай қауесет емес экс министр Алексей Цойдың айтқаны. Алайда бұл уәде орындалмады.
Өткен жылдың шілде айында Мемлекет басшысы Қасым-Жомарт Тоқаев Файзерге қатысты сын айтқан еді. Нақтырақ айтсақ, аталған препаратты жеткізу үшін 2 жыл бұрын тапсырма берілген болатын. Келісімге сәйкес, Файзер 2021 жылдың мамыр айында 2 миллион доза кіргізілуі керек. Бірақ уәде етілген дәрі-дәрмектер ел шекарасынан өткен жоқ.
Қасым–Жомарт Тоқаев – Қазақстан Республикасының президенті:
«Компания Қазақстанға деп бөлген Pfizer вакцинасын жеткізу орындалмады. Келісім бойынша, Pfizer мамыр айында Қазақстанға екі миллион дозаны беруді жоспарлағанын айта аламын. Үкімет бұл жоспардың іске аспай қалуын Pfizer қойған бірқатар талаппен байланыстырады. Президент әкімшілігі мен үкіметке мән-жайды анықтап, біздің нарығымызға қажет осы препараттың жеткізілуіне кесір тигізген лауазым иелеріне шара қолдануды тапсырамын».
Президент тапсырмасы тек өткен жылдың соңында орындалды. Қазақстан Файзердің 4 миллион дозасын сатып алды. Ал осы жылдың басында Денсаулық сақтау министрлігі Санитарлық – эпидемиологиялық бақылау комитеті қазір аталған екпенің 2 миллион 400 дозасы бар деп ресми мәлімдеді. Ал Мәжіліс депутаты Ғани Хамзин бұл сандармен келіспейді. Себебі, бірқатар аймақтарда тек отандық екпе ғана қолжетімді.
Ғани Хамзин — ҚР Парламенті мәжілісінің депутаты:
«Біздің азаматтар Дүниежүзілік денсаулық сақтау ұйымы растаған екпелерге қол жеткізе алмай отыр. Вакцина елге уақытылы жеткізілмегендіктен шетелде білім алатын студенттер оқуына бармады. Ақылы түрде «Пфайзер» екпесін салдырту үшін көбі басқа мемлекеттерге аттануға мәжбүр. Мәседен, Алматы қаласы, Алматы және Түркістан облыстарында тек «Казвак» ғана бар. Қалғаны қашан әкелінетіні белгісіз. Бұл халық үшін көптеген ыңғайсыздық туғызып отыр».
Түркістан облысында пандемия басталғалы індеттің 18 375 жағдайы тіркелген. Өңірлік денсаулық басқармасының мәліметінше, комирнати екпесін салу көрсеткіші 80 пайызды құрап отыр. Ал 94 мыңнан аса адам екі дозасын да қабылдаған. Айтуларынша, облыста бірнеше екпе алуға мүмкіндік бар.
Алтын Досанова – Облыстық қоғамдық денсаулық басқарма басшысының орынбасары:
«Вакцинацияға қарастырылған вакциналар отандық казвак бар. Және де синафарм. Файзер екіқабат әйелдерге, емізулі әйелдерге және жасөспірімдерге қарастырылған. Бүгінгі таңда вакцинацияға және ревакцинацияға толық вакциналар жеткілікті. Казвак вакцинамыз, синафарм және файзер. Ревакцинацияға спутник лайт та бар. Толық жеткілікті».
Шенеуніктер өткен жылдан бері Pfizer вакцинасын ақылы негізде алуға болатынын айтып келеді. Алайда оның қашан салына бастайтыны әлі күнге дейін белгісіз. Осының кесірінен қаңтар айында оқуға аттанатын «Болашақ» бағдарламасының студенттері көрші Қырғыз елі мен Өзбекстанға барып екпе алуға мәжбүр болған. Өйткені QazVac вакцинасын Дүниежүзілік денсаулық сақтау ұйымы тіркеген жоқ
