Күн санап адам өміріне аса қауіпті жаңа химиялық препараттарға деген сұраныс өсіп келеді. Бір өкініштісі, елімізде есірткіге деген тәуелділік мектеп оқушылары мен жасөспірімдер арасында өршіп тұр. Ал синтетикалық есірткінің таралуына себепкер — телеграмдағы жасырын каналдардың үздіксіз жұмыс жасауы. Тіпті жастар оңай ақша табу үшін аталған әлеуметтік желі арқылы есірткі сатумен де айналысады екен.
Мәселен Алматыда есірткі тасмалдауды көбінесе мектеп жасындағы балалар жасайтын көрінеді. Ал еліміздегі есірткі тәуелділігіне байланысты деректер бүгінге дейін көңілді көншітпей тұр. Арнайы зерттеулерге сәйкес, әр бесінші мектеп оқушысы кем дегенде бір рет синтетикалық есірткіні қолданып көрген. Сондай-ақ, нашақорлардың арасында мефедронға тәуелділігі сонша оған тәнін айырбастауға тартынбайтын қыздардың бары анықталды. Мефедрон немесе «меф» — синтетикалық есірткінің бір түрі. Дәрігерлер синтетиканы қолдану ерте инфарктқа, инсультқа және түрлі ауытқушылыққа соқтыратынын айтады.
Сондай-ақ, 400-ден астам телеграмдағы арналар мен арнайы чаттар синтетикалық есірткілерді бүгінге дейін еш кедергісіз тасмалдап отыр. Тіпті есірткі бизнесінде мансаптық өсу сатысы да бар көрінеді. Бұл туралы «Наркостоп» жобасын қолға алып, есірткі тасмалымен күресіп жүрген Нұржан Жақыпов жария етті. Ол телеграмдағы топтардың қалай жұмыс жасайтынын бақылау мақсатында жабық чаттарға жұмысқа орналасып көрген. Жүйені басқарып отырған адамдарды нақты анықтау, тіпті қай елдің азаматы екенін білу мүмкін емес дейді. Сәйкесінше, ескірткі тасмалдаушы ретінде жұмысқа орналасқан тұлғаның да жеке мәліметін ешкім тексеріп жатпайды екен.
Ең сұмдығы, есірткі тасмалдаушы бұдан былай жасырынып жұмыс жасауды да қойған. Яғни, қораптарына танымал компанияның логотипін жабыстырып, тамақ емес, есірткі жеткізу қулығына көшкен. Сот телеграм-каналдар арқылы шешім шығарса да, аталған әлеуметтік платформаның әкімшілігі заңсыз тасмалға деркезінде тосқауыл қоймай отыр. Нәтижесінде, жасөспірімдер арасында синтетикалық есірткінің таралуы белең алуда. Сондықтан телеграм — бүгінде ең үлкен қауіп төндіріп тұрған желілердің қатарында тұр.
