Түркістан облысында ажырасушылар азайып, отау құрғандар көбейген. Бұл туралы статистика басқармасы баяндады. Алайда жалпы еліміздегі жағдай керісінше, жыл санап жастар арасында шаңырағы шайқалатындар қатары артып келеді. Отбасы құндылығына төнген қауіпке алаңдаушылық білдірген мәжілісмендер басқосуда мәселені талқылап, қаралымға бірқатар ұсыныстар жіберді.
Биыл жыл басынан бері елімізде 120 мыңға жуық адам ажырасуға арыз берген. Әсіресе, солардың ішінде жастардың көптігі мәжілісмендерді қатты алаңдатып отыр. Мәселені әлеуметтік жағдайға сілтей салу қисынсыз екенін алға тартқан Дархан Мыңбай екі ортада балалардың зардап шегетініне қынжылыс білдірді.
Дархан Мыңбай, ҚР Парламенті Мәжілісі депутаты:
«Дүние-мүлік бөлісу, балалардың тұрғылықты жерін анықтау дауы, алимент, туыстық қатынастардың үзілуі сияқты мәселелердің ауыртпалығы да, моральды-әлеуметтік қиыншылықтары да жетерлік. Толық емес отбасында толыққанды бозбала мен бойжеткенді тәрбиелеу де оңай болмас. Отбасы жайлы ұлттық баяндама мен ресми статистика бойынша 2015 – 2019 жж. 274,5 мың отбасы ажырасқан»
Ал Түркістан облысында биыл шаңырағы шайқалғандардан гөрі үйленгендер саны басым. Атап айтсақ, жыл басынан бері 444 отбасы ажырасса, 8387 адам некелескен.
Бек Мақсатұлы, Түркістан қаласы статистика басқармасының басшысы:
«Ажырасудың алдын алу мақсатында бірқатар ұсыныстар енгізілді. Оның ішінде орта және жоғары оқу орындарында отбасы құндылықтары жайлы қосымша пән енгізілуі мүмкін. Көпбалалы отбасылар үшін банк тарапынан ынталандыру жұмыстары да жүргізіледі. Тіпті әр ұжым арасында «Мерейлі отбасы» байқауы ұйымдастырылмақ. Аталған ұсыныстар қолдау тапса, ажырасумен күрес жұмыстары басталады».
