Азық-түлік апта сайын қымбаттап, инфляция өсіп барады. Осылай деген Үкімет басшысы Асқар Мамин әлеуметтік тауарлар бағасын тізгіндеуді тапсырды. Әсіресе, әлеуметтік маңызы бар қант, жұмыртқа, тауық пен сиыр етінің 10 пайыз қымбаттауы инфляцияның көтерілуіне қатты әсер еткен.
Елімізде соңғы бір айдың өзінде ет 1,3, өсімдік майы – 0,6, қант 1,1 пайызға қымбаттаған. Бұған тауық еті, жұмыртқа, қант пен сиыр еті бағасының өсуі, сондай-ақ жұртты әбден сарсаңға салған дизель отынының тапшылығы әсер еткен.
Ерболат Досаев, ҚР Ұлттық банк төрағасы:
«Азық-түлікке жатпайтын инфляция қыркүйекте дизель (бір айда 3,8%), газ (0,9%) және көмір (1,9%) бағасының көтерілуі аясында 7,3%-тен 7,5%-ке дейін 0,2 пайыздық тармаққа өсті. Жанар-жағар майдың қымбаттауы дәнді-дақылдар бағасының өсуіне алып келді. Бұған қоса, көрші елдердегі бағаның қымбаттауы да тікелей әсер етіп отыр».
Бағалар өсімі әсіресе жеті өңірде байқалды. Бұл тізімде Атырау, Қарағанды, Қызылорда, Павлодар, Солтүстік Қазақстан және Түркістан облысы бар. Түркістан қаласының өзінде жазда келісі 120-130 теңгеден сатылған бірінші сұрыпты ұнның келісі қазір 150-200 теңгеден саудаланып жатыр. Бұл аз десеңіз, «Жыл соңына дейін жұмыртқа мен ет қымбаттайды» деп жұрт дүрлігіп жүр.
Лаура Жанасбаева «Түркістан» әлеуметтік-кәсіпкерлік корпорациясы» ақ азық-түлікті тұрақтандыру департаментінің бас менеджері:
«Нан өндіруші кәсіпорынға бөлек заем беріп жатыр. Осының негізінде қазіргі таңда бүкіл 13 әлеуметтік дүкен мен ірі супермаркетте нан 70 теңгеден сатылуда. Нарықта ол қазір 85 пен 90 теңге аралығында, білесіздер»
Өнеркәсіптік шикізат негізінен Қытай мен дамыған елдерде сұранысқа ие. Осы жылы оның да құны өсті. Ал тамызда жүргізілген мониторинг нәтижесінде елімізде ауыл шаруашылығы шикізаты 22,7 пайызға қымбаттағаны байқалады.
