Осы жолғы отырысты нан бағасынан бастаған мәжілістегілер сондай-ақ халықты әбігерге салған дизель отынының тапшылығына да тоқталды. Түйткілді мәселенің шешімі не болмақ? Заң қабылдаушы органдар елді дүрліктірген қымбатшылық пен тапшылық түйінін қалай тарқатпақ? Толығырақ тілші материалында.
«Бағасы қарқынмен өсіп жатқан нан, макарон және жарма өнімдерімен қамтамасыз ету мәселесі шешілмесе, мұның салдары ауыр болады». Мәжіліс отырысында дәл осылай дабыл қаққан депутат Ғалым Әміреев астық түсімінің төмендеуі құрғақшылықтан ғана емес деп, елді елең еткізді. Оның айтуынша, бұл жерде сондай-ақ жанар-жағармай тапшылығы, тыңайтқыштар мен ауылшаруашылығы техникасы бағасының жыл санап өсуі секілді қордаланған мәселелер жатса керек.
Ғалым Әміреев, ҚР Парламенті Мәжілісінің депутаты:
«Логика қайда? Не істеу керек? Ұн тартушыларға шикізат жетіспейді. Астық өндірушілер қауымдастығы тапшылықтың қолдан жасалуына жол береді. Өндірушілер бағаның одан әрі өсуін күтіп, астықты өздерінде ұстап қалуы мүмкін. Қазір жұмсақ бидайдың бір тоннасы шамамен 125 мың теңге тұрады».
Ал соңғы аптада көлік жүргізушілерін сарсаңға салған дизель отыны мәселесін шешу үшін халық қалаулылары мұнай өңдеу жобалары бар жекеменшік кәсіпкерлерге қолдау көрсетуді ұсынды. «Мұнай экспорттаушы мемлекет бола тұра, өнімді импорттауға мәжбүр болуымыз ұят», — деді олар. Естеріңізде болса, бұған дейін елімізде қара алтын өндіретін зауыттардың төртіншісін салу қызу талқыланған болатын. Алайда сол бойы шешім қабылданған жоқ, бірақ қолданыстағы зауыттарды жаңғырту жоспарланған еді. Бірақ жеме-жемге келгенде оның да нәтиже көрсеткені шамалы. Әйтпесе, халық солярка тапшылығын тартпас еді.
Серік Ерубаев, ҚР Парламенті Мәжілісінің депутаты:
«Халық арасында бағаның өсуі жасанды емес пе деген ой туады. Осы орайда, монополияға қарсы өкілетті органдарға да сұрақтар бар. Ал қосымша мұнай өндірісін дамытсақ, біз мұнай ғана емес, мұнай өнімдерін экспорттаушы мемлекет бола алар едік. Оған объективті негіздер бар, қазақстандық бензин мен солярканың бағасы көрші елдерден әледақайда төмен».
Бұл жолы мәжіліс төрағасы Бейбіт Атамқұловқа шүйлікті. «Өнеркәсіптік саясат туралы» заң жобасы жайлы әріптесінің қойған сұрағын түсінбеген индустрия және инфрақұрылымдық даму министріне Нұрлан Нығматулин тағы да қайталап түсіндіріп берді.
Түйін: Енді дизель отыны тапшылығы мен оның қымбаттауына нақты не әсер етіп отырғаны тексерілмек. Сонымен қатар «Азық-түлік келісімшарт корпорациясы» мен тұрақтандыру қорларына үкімет резервінен қосымша бюджеттен қаражат бөліп, ұн өнімдерінің бағасын тұрақтандыру көзделуде.
