Банктер қарыз алушының мүлкін тәркілеген кезде құнын кемітпеуі тиіс. Мәжілісте көтерілген бұл мәселеге Алматыда болған қанды оқиға сеп болды. Кепілдік арқылы несие алғандардың мүлкі қанша уақытта тәркіленуі керек? Бұл жайында тұрғындар не дейді? Нұрлан Сұлтанбек тарқатады.
Банктер қарыз алушының мүлкін тәркілеген кезде бағалау құнынан 10-15 проценттен артық өзгертпеу керек. Бүгінгі мәжіліс отырысында осылай деген Андрей Ленник «Жеке тұлғалардың банкротқа ұшырауы туралы» заң қабылдау қажеттігін атап өтті. Басты себеп — борышкерге келген психологиялық қысым. «Осының кесірінен елімізде қаншама адам тіпті өз-өзіне қол жұмсауға дейін барады», — дейді Мәжіліс депутаты.
Андрей ЛИННИК, ҚР Парламенті Мәжілісінің депутаты:
«Қарыз алушылардың көбі суицид сияқты соңғы амалдарға да барып жатады. Халықтың мойнында қарыздың көп болуын Ұлттық банктің жоғары базалық мөлшерлемесі, әділетсіз сот шешімдері, сот орындаушылары мен банк қызметкерлерінің ықтимал астыртын сөз байласуы сияқты жайттар ушықтырып жібереді».
Депутат тарапынан банктердің тәркіленген мүлік құнын азайту мүмкіндігін шектеуі тиіс деген ұсыныс айтылды. Ал, кепілдік арқылы банктен ақша алып, қарызын өтей алмағандарға тұрғындардың пікірі әртүрлі. Бірі, қос қолдап қолдаса, бірі «жеңілдіктер болуы керек», — деп ашынады.
Түйін: Еске сала кетейік, осыдан 2 күн бұрын орын алған қайғылы оқиғаға қарыз алушының банктен алған жалғыз баспанасы түрткі болған еді. 121 млн теңге қарыз берген банк қарыз алушыдан 184 млн теңгеге бағаланған адам тұрмайтын үй-жайы бар жер телімін тәркілеген. Ал қаржылық ұйым оның құнын 96 млн теңгеге бағалаған, яғни құнын екі есе азайтқан. Бұл аздай, банк қарыз алушының тұратын үйін де тартып алмақ болған. Осыған ашуланған борышкер полиция қызметкерлері мен жеке сот орындаушыларын атып өлтірді.
