Еліміздегі эпидахуалдың күрт нашарлағанына қарамастан той жасаушылар азаяр емес. Айыппұл төлеп оңай құтылған халық әлі де қояр емес. Еліміздің түкпір-түкпірінде той жасап ұсталған тұрғындар да жетерлік.
Алматы қалалық бас санитар дәрігерінің орынбасары Сәдуақас Байғабылов мониторингтік топтар заң бұзушылықты әлеуметтік желі арқылы анықтайтынын айтты. Қазіргі таңда жауаптылар денсаулық сақтау министрлігіне арнайы ұсыныс жолдамақ.
-«Пандемия кезінде той жасайтындар азаймай тұр. Тіпті, ондай жерлерде әншілердің де жүретінін көрдік. Оларға заң бойынша айыппұл салынып жатыр. Біз қазір той мен адам көп жиналатын шаралар туралы хабарлаған адамға сыйақы беру мәселесін де қарастырып жатырмыз», – деді Алматы қаласы санитариялық-эпидемиологиялық бақылау департаменті басшысының орынбасары.
Айта кетейік, кез келген тұрғын жергілікті әкімдік сайтынан мониторингтік топтың нөмірін таба алады.
