Ақмола облысында ғалымдар құрғақшылыққа төзімді бидай сұрпын ойлап тапты,-деп хабарлайды TurkistanZaman ақпараттық порталы BAQ.KZ-ке сілтеме жасай отырып.
Қазіргі таңда жаһандағы ең өзекті мәселе құрғақшылық пен ауа-райының тұрақсыздығы болып отыр. Сондықтан бұрын елімізде тек астықтың сапасы мен өнімділігіне мән берген болса, қазір табиғаттың түрлі құбылысына төзімді болғаны маңызды.
Отандық ғалымдар келеңсіз жайтты ескеріп, он жылға жуық уақыт зерттелген жұмсақ және қатты бидай тұқымдарын егістік алқабына сынамаға жібермек. Онда бірнеше жыл тексерістен өткен соң, жаппай себуге ұсынылады.
Астық шаруашылығы ғылыми-өндірістік орталығының мамандары жаңа өнімдердің нақты сипаттамаларын әзірше құпия сақтап отыр. Бірақ, ғылыми жетістік болып саналатын екі өнім де қуаңшылыққа төзімді болатыны анық.
«Құрғақшылыққа төзімді дегенді қалай түсінуге болады? Ол жауын-шашын аз кезде де және ылғал мол жылдары да өнімділігі бірқалыпты тұқым. Бізде бұл көрсеткіш гектарына 15-18 центнер. Міне, ауа райы қалай құбылса да, біз ойлап тапқан бидай тұқымдары осы деңгейден төмендемеуі тиіс. Ғалымдарымыздың қазіргі бар мақсат-міндеті осы», – дейді астық шаруашылығы орталығының бөлім жетекшісі Ирина Ошергина.
