Бокстан Қазақстан құрамасының спортшысы, Түркістан облысының өрені Сәкен Бибосынов Токио Олимпиадасының жартылай финалына шықты.
Ширек финалда Сәкен испаниялық Габриэль Эскобармен кездесті. Алғашқы раундтан жекпе-жек тізгінін өз қолында ұстаған Сәкен бүкіл техникалық шеберлігін паш етті. Ұзын қолдарымен қарсыласын күтіп алып, “сыбағасын” беріп жүрді.
Өте тартысты өткен жекпе-жекте отандасымыз 3:2 есебімен жеңіске жетті. Бірінші раундта Сәкеннің жойқын соққысынан кейін қарсыласы нокдаун алғанын да айта кеткен жөн.
Төрешілер бірінші раундтағы жеңісті 4:1 есебімен Бибосыновқа, екінші раундта Эскобарға берді. Үшінші раундта Сәкен Бибосынов жеңіске жетті.
Сәкен батыр Токио Олимпиадасының жартылай финалына шықты. Қоржынында кем дегенде қола жүлде бар. Енді соны алтынға айналдыру керек.
Бибосынов финал жолдамасы үшін таласта британдық Джамаль Яфаимен жекпе-жек өткізеді.
