Қазақстандағы сайлауалды науқан аясында саяси партиялар өңірлердегі кездесулер мен телевизиялық дебаттар барысында білім беру жүйесін дамытуға қатысты өз бастамаларын ұсынды. Ұсыныстар педагогтердің әлеуметтік мәртебесін арттырудан бастап, жасанды интеллектіні білім беру процесіне енгізу, жоғары білімнің қолжетімділігін кеңейту, ауылдық жерлерді кадрмен қамтамасыз ету және ғылымды өндіріспен ықпалдастыру мәселелерін қамтыды.
Сайлауалды кезеңде партия өкілдері еліміздің түрлі өңірлерінде сайлаушылармен, еңбек ұжымдарымен және сала мамандарымен кездесулер өткізді. «Әділет» партиясының өкілдері Қызылорда облысында энергетика, ауыл шаруашылығы, кәсіпкерлік, білім, мәдениет және өнер саласының өкілдерімен пікір алмасты. ЖСДП Ақмола және Қарағанды облыстарында кездесулер өткізіп, Көкшетаудағы №19 мектептің педагогикалық ұжымымен білім беру сапасы, мұғалімдердің еңбек жағдайы, мектептерді кадрмен қамтамасыз ету және білім беру инфрақұрылымын дамыту мәселелерін талқылады.
«Байтақ» партиясы экологиялық қауіпсіздік пен тұрақты дамуға басымдық беріп, тұрғындармен және жастармен кездесулерінде қоршаған ортаны қорғау, қалдықтарды басқару, табиғи ресурстарды тиімді пайдалану және коммуналдық инфрақұрылымды жетілдіру мәселелерін көтерді.
Қазақстанның Халық партиясы еңбек ұжымдарымен кездесулер барысында әлеуметтік-экономикалық даму, жұмыспен қамту, білім беру, денсаулық сақтау, тұрғын үй саясаты және өңірлерді дамыту бағыттарына тоқталды. Сонымен қатар Павлодардағы кәсіподақ өкілдерімен кездесуде еңбек құқықтарын қорғау тетіктеріне қатысты пікірталас өрбіді.
«Ауыл» партиясының өкілдері инженерлік инфрақұрылым мен сумен жабдықтау мәселелерін көтерсе, «Ақ жол» партиясы сайлаушылармен және медицина қызметкерлерімен кездесулер өткізіп, кәсіпкерлікті қолдау, салық саясаты және мемлекеттік басқару мәселелері жөніндегі ұстанымдарын таныстырды. Respublica партиясы өнеркәсіп кәсіпорындарының қызметкерлерімен кездесіп, өндіріс, әлеуметтік саясат, экспорт, импортты алмастыру және өңірлік даму мәселелерін талқылады.
Телевизиялық дебат барысында білім беру жүйесін жаңғыртуға қатысты нақты бастамалар ұсынылды. «Әділет» партиясының өкілі Рауан Кенжеханұлы OpenAI компаниясымен бірлескен жоба аясында Қазақстандағы 160 мың мұғалімнің ChatGPT Edu білім беру сервисіне тегін қол жеткізгенін мәлімдеді. Оның айтуынша, бұл сервис оқу жоспарларын әзірлеу, есептерді дайындау және білім беру саласындағы талдау жұмыстарын жүргізу үшін пайдаланылуы мүмкін. Сонымен қатар ол жоғары оқу орындарында технологиялар трансфертін дамыту арқылы ғылым мен экономиканың байланысын күшейтудің маңызын атап өтті.
ЖСДП өкілі Мақсұт Насибулов жоғары білімнің қолжетімділігін кеңейту мәселесін көтеріп, мектептегі білім сапасын арттыру, білімді бағалау жүйесін жетілдіру және жоғары сыныптарда бейіндік оқытуды дамыту жөніндегі ұсыныстарын айтты.
«Байтақ» партиясының өкілі Аслан Байзаханов экологиялық зерттеулерде математикалық талдау мен цифрлық технологияларды қолданудың маңызын атап өтіп, қоршаған ортаның жай-күйін бағалауда ғылыми тәсілдерді кеңінен пайдалануды ұсынды.
«Ауыл» партиясының өкілі Шахмардан Байманов ауылдық жерлерді кадрмен қамтамасыз ету мәселесіне тоқталып, ауылдық грантпен білім алған түлектерді өз өңірлеріне жұмысқа орналастыру тетігін жетілдіруді ұсынды. Сонымен бірге жас мамандарға көтерме жәрдемақы мен жеңілдетілген тұрғын үй несиесін беру тәжірибесін жалғастыру қажеттігін айтты.
«Ақ жол» партиясының өкілі Дулат Тәстекей білім беру және ғылым саласына бюджет қаражатының тиімді жұмсалуын бақылауды күшейту, педагогтердің еңбекақысын арттыру және ғылыми-инновациялық жобаларды қолдау жөніндегі ұсыныстарын жариялады.
Respublica партиясының өкілі Мейрамгүл Мәдәлі еңбек нарығындағы өзгерістерге байланысты Мамандықтар атласын тұрақты түрде жаңартудың маңызын атап өтті. Оның айтуынша, жасанды интеллектінің дамуы жүздеген мамандықтың мазмұнын өзгертуі мүмкін. Осыған байланысты партия экономика сұранысына сәйкес жаңа білім беру бағдарламаларын әзірлеуді, IT және жасанды интеллект бағыттарын кеңейтуді, жұмыс берушілер мен білім беру ұйымдарының өзара байланысын күшейтуді ұсынды. Сондай-ақ өңірлерде мектептер мен балабақшалар салуға инвестиция тарту, ауыл мұғалімдерін қолдау және ғылымды өндіріспен ықпалдастыру мәселелері көтерілді.
Осылайша, сайлауалды пікірталастар барысында білім беру жүйесін жаңғырту, педагогтерді қолдау, цифрлық технологияларды енгізу, жасанды интеллект мүмкіндіктерін пайдалану және болашақ мамандарды даярлау мәселелері саяси партиялар ұсынған негізгі бастамалардың бірі болды.
