saqnews.kz
Бүгін Қазақстан Республикасының Президенті Қасым-Жомарт Кемелұлы Тоқаевтың кеңесшісі Мәлік Отарбаев Мемлекет басшысының халыққа Жолдауын түсіндіру және ондағы негізгі міндеттерді насихаттау мақсатында Отырар ауданының тұрғындарымен кездесті. Жиынға аудандық ардагерлер кеңесінің мүшелері, ауыл ақсақалдары, қоғамдық ұйымдардың өкілдері, белсенді азаматтар мен жастар қатысты.
Кездесуді аудан әкімі Қайрат Жолдыбайұлы ашып, жүргізді. Ол өз сөзінде Жолдауда көрсетілген басымдықтардың ел дамуы үшін стратегиялық маңызын атап өтіп, аудан көлемінде атқарылып жатқан жұмыстар жөнінде ақпарат берді.
Алғаш болып аудандық мәслихат төрағасы Уалихан Ұзақов сөз сөйлеп, Жолдауда айқындалған бағыттарды жүзеге асыруға арналған жоспарлар мен ауданда қолға алынған іс-шаралар туралы жан-жақты баяндады.
Ауданның құрметті азаматы, білім саласының ардагері Мария Белгібаева Жолдаудың әлеуметтік салаға, әсіресе білім беру жүйесін жаңғыртуға бағытталған бастамаларын түсіндіріп, олардың маңызын атап өтті.
Жастар атынан сөз алған Әбдікерім Дінмұхаммед Жолдаудың жастарға жүктейтін жауапкершілігі мен қоғамдағы рөлін айшықтап, өз көзқарасын білдірді. Сонымен қатар Темір ауылының тұрғыны Бегімше Ибрагимов пен шәуілдірлік ақын Дәурен Ақсақалов ел дамуына қатысты ой-пікірлері мен ұсыныстарын ортаға салды.
Кездесу барысында ҚР Президентінің кеңесшісі Мәлік Нұржанұлы Жолдауда көрсетілген негізгі басымдықтардың мән-маңызына тоқталып, олардың елдің әлеуметтік-экономикалық дамуына қосатын үлесін түсіндірді. Сондай-ақ тұрғындар қойған сұрақтарға жауап беріп, айтылған ұсыныстардың назарға алынатынын жеткізді.
