Бүгін Түркістан қаласындағы «Достық үйінде» ҚХА-ның 30 жылдығына орай этнос жастарының қатысуымен «Кім білгір?» интеллектуалды ойыны өтті.
Аталған іс-шара Түркістан облыстық қоғамдық даму басқармасы «Қоғамдық келісім» КММ-нің қолдауымен ұйымдастырылды.
Мемлекеттік тілдің мәртебесін көтеруді көздеген сайыстың ашылу салтанатында сөз алған Түркістан облыстық қоғамдық даму басқармасы басшысының орынбасары Нұрсұлтан Сейтжанов бұл іс-шараның талантты және білімді жастарды қолдауда маңызы зор екенін атап өтті.
Ақылдылар мен тапқырлардың басын қосқан сайыс 3 кезең бойынша өтті. Атап айтсақ, алғашқы кезеңде сайыскерлер «Мақал-мәтелдің жалғасын табу», 2-кезең «Жұмбақтың жауабын табу» және 3-кезең «Диалект немесе көнерген сөздердің мағынасын ашып айту» бойынша бақ сынады.
Сайысқа Түркістан облыстық қоғамдық даму басқармасы басшысының орынбасары Нұрсұлтан Сейтжанов, «Қоғамдық келісім» КММ-нің басшысы Эльмира Жанғазиева, облыстық ҚХА жанындағы Аналар кеңесінің төрайымы Гүлсара Тоққұлова және облыстық ҚХА жанындағы Медиация кеңесінің төрағасы Бақытжан Бейсембаев төрелік етті.
Жарыс қорытындысында 1-орынды Сауран қаласының құрамасы, 2-орынды Төлеби ауданының құрамасы, ал 3-орынды Түлкібас ауданының командасы иеленді. Сондай-ақ келестік Мухлиса Эркинжанова «Үздік ойыншы» болып танылды. Сайысқа белсене қатысқан басқа да аудан, қалалардың командаларына ынталандыру сыйлықтары берілді. Осылайша, өңірдегі этнос жастары сайыста өз белсенділіктерін көрсетіп, қазақ тіліне жетік екендіктерін дәлелдеді.
Жеңімпаздар мен жүлдегерлерді Түркістан облыстық қоғамдық даму басқармасы басшысының орынбасары Нұрсұлтан Сейтжанов арнайы марапаттап, оларға Алғыс хаттарды табыс етті.
