Түркістанда 23 маусым – Мемлекеттік қызметшілер күніне арналған іс-шара өтті. Мерекелік жиынға Түркістан облысының әкімі Нұралхан Көшеров қатысып, мемлекеттік қызметшілерді төл мерекесімен құттықтады.
– Халыққа адал қызметкер болу – абыройлы міндет. Президентіміз Қасым-Жомарт Кемелұлы: «Мемлекеттік қызметшінің сапасы – бүкіл еліміздің сапасы деп айтуға болады. Мемлекеттік қызметші болу – антқа адал болу» деген сөз» деп атап өткен болатын. Баршамыз осы ұстанымға сай болуымыз керек. Мемлекеттік қызметшінің басты міндеті – Отаны мен халқына адал қызмет ету. Бүгінде облысымыздағы 501 мекемеде 6331 мемлекеттік қызметші жұмыс атқаруда. Өткен жылы облыста 231 мемлекеттік қызметші өз лауазымынан жоғарылады. Бұл меритократия қағидасының сәтті жүзеге асуының көрінісі. Президентіміздің саяси реформалары нәтижесінде ел басқаруға жаңа көшбасшылар келуде. Атап айтқанда, 2021 жылдан бері өңірімізде 210 ауылдың әкімі сайланды. Олардың арасында түрлі сала өкілдері бар. Талай азаматқа мемлекеттік қызметке жол ашылды. Одан бөлек, Өңірлік кадрлық резервіне 32 адам қабылданды. Оның 13-і жұмысқа орналасты. Мұның бәрі мемлекеттік қызмет саласындағы реформалардың сапалы атқарылып жатқанын білдіреді. Мемлекеттік қызмет – қоғамның айнасы. Билікке деген сенім осы саладағы азаматтардың іскерлігіне қарап қалыптасады. Сондықтан облысымыздың қарқынды дамуы сіздерге тікелей байланысты. Ел игілігі жолындағы қызметтеріңізде қашан да абыройлы болып, жетулеріңізге тілектеспін, – деген Нұралхан Көшеров еңбегімен дараланған мемлекеттік қызметшілерді марапаттады.
Салтанатты жиында мемлекеттің дамуына үлес қосқан мемлекеттік қызметшілер «Мемлекеттік қызмет ардагері» және «Үздік мемлекеттік қызметші» төсбелгілерімен, Түркістан облысы әкімінің грамотасы мен алғыс хатымен марапатталды. Сонымен бірге Түркістан облыстық мәслихатының төрағасы Нұралы Әбішов пен ҚР Мемлекеттік қызмет істері агенттігінің Түркістан облысы бойыша департаментінің басшысы Абылайхан Наурызбаев та үздіктерді марапаттап, жылы лебіздерін білдірді.
Мерекелік іс-шарада Түркістан облысындағы мәдениет және өнер ұжымдарының әншілері мен бишілері, күйшілері өнер көрсетіп, мазмұнды концерттік бағдарлама ұсынды.
