Сарыағаш ауданының индустриялық-инновациялық даму бағытында жүзеге асып жатқан жобалардың бірі – Құркелес ауылдық округінде орналасқан «Bah-Asmar» жауапкершілігі шектеулі серіктестігінің бір реттік ыдыс-аяқ өндіретін цехы. Аталған өндіріс орны бүгінгі таңда тәулігіне 100 мың дана өнім шығарып, 55 адамды тұрақты жұмыспен қамтып отыр. Бұл – аудан халқы үшін жаңа жұмыс орындарының ашылуы мен әлеуметтік-экономикалық тұрақтылықтың нығаюына елеулі үлес.
Аудан әкімі Арман Абдуллаев жұмыс сапары барысында өндірістік нысанның тыныс-тіршілігімен жақын танысты. Заманауи қондырғылармен жабдықталған цехта жұмысшылардың еңбек ету жағдайларына да баса назар аударылды. Кәсіпорын басшысы Ерлан Исаев аудан басшысына өндірістің қазіргі мүмкіндіктері мен алдағы даму жоспарлары жайлы баяндап, сұраныстың артып келе жатқанын және өнім көлемін ұлғайту қажеттігін атап өтті.
Қазіргі таңда «Bah-Asmar» ЖШС бір реттік пластик және қағаз ыдыс-аяқтарды шығарып, оларды жергілікті сауда орындарына, қоғамдық тамақтану нүктелеріне және аймақтық нарыққа жеткізуде. Кәсіпорын экологиялық қауіпсіздік талаптарын сақтай отырып жұмыс істейді. Өнімдері санитарлық нормаларға толық сай және тұтынушылар тарапынан жоғары бағаланып отыр.
Сонымен қатар, кәсіпорынның өндірістік қуатын арттыру бағытында қосымша инвестиция тарту, жаңа құрылғылар орнату және экспорттық әлеуетті зерттеу жұмыстары жүргізілуде. Жоспар бойынша, келер жылы цех өнімін шет мемлекеттерге экспорттау мүмкіндігі қарастырылмақ. Бұл өз кезегінде ауданның экономикалық әлеуетін арттырып, өңірлік кәсіпкерлік белсенділікті одан әрі дамытуға жол ашады.
Айта кету керек, Сарыағаш ауданында кәсіпкерлікті дамытуға қолайлы жағдай жасалған. «Атамекен» кәсіпкерлер палатасының филиалы, мемлекеттік бағдарламалар аясындағы қолдау тетіктері және инфрақұрылыммен қамтамасыз ету жұмыстары кәсіпорындардың табысты жұмыс істеуіне оң әсерін тигізіп отыр. Арнайы экономикалық аймақтар мен индустриялық аймақтар арқылы өндірістік жобаларға жер телімдері беріліп, инфрақұрылым тартылуда.
