Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» ұлттық экологиялық науқаны шеңберінде Сарыағаш ауданында өткен кең ауқымды сенбілік ел азаматтарының табиғатқа деген жауапкершілігін арттыруға бағытталды. Бұл жолғы шараның ерекшелігі – оған аудан тұрғындары ғана емес, жастар, еріктілер, мемлекеттік қызметкерлер және кәсіпкерлік субъектілері де белсене атсалысты.
Сенбілік жұмыстары таңғы сағат 08:00-де бір мезгілде басталып, аудандағы барлық мекемелер мен ұйымдарға нақты аумақтар бөлініп берілді. Олар өздеріне жүктелген аймақтарда тазалық пен көріктендіру шараларын жүйелі түрде атқарды. Аудан орталығы мен елді мекендерде орналасқан қоғамдық орындар, мектеп, балабақша аумақтары, мәдениет ошақтары, саябақтар мен демалыс аймақтары күл-қоқыстан тазартылды. Сонымен қатар, көшелердің бойындағы ағаштардың түбі әктеліп, бордюрлер сырланды. Қала мен ауыл ішіндегі жол жиектерінде шөптер орылып, қураған бұтақтар кесіліп, арнайы техникалардың көмегімен шығарылды.
Аудан басшысы Арман Абдуллаев сенбілікке өзі де қатысып, бірқатар нысандарды аралап шықты. Ол өз сөзінде:
«Тазалық – тәртіптің айнасы. Қоршаған ортаға жанашырлық таныту – әр азаматтың борышы. Біз балаларымызға көрікті әрі таза табиғатты аманаттауымыз керек», – деп атап өтіп, сала басшылары мен мекеме жетекшілеріне сенбілік жұмыстарын тек бір реттік шара ретінде емес, жүйелі үдеріс ретінде жалғастыруды тапсырды.
Шара аясында аудан бойынша бірнеше тонна тұрмыстық және құрылыс қалдықтары арнайы орындарға тасымалданды. Бұл жұмыстарға коммуналдық мекемелерден бөлек, жеке кәсіпкерлер өз техникасымен көмек көрсетті. Жол жиектері мен жаяу жүргіншілер жолдары да ретке келтіріліп, кейбір аймақтарда гүлзарлар отырғызылды.
Сенбіліктің басты мақсаты – елді мекендердегі тазалықты қамтамасыз ету ғана емес, сонымен бірге қоғам назарын қоршаған ортаны қорғауға аудару. Экологиялық мәдениетті қалыптастыру, тұрғындардың табиғатқа жанашыр көзқарасын дамыту – бүгінгі күннің маңызды міндеттерінің бірі. Бұл бағытта Сарыағаш ауданында бұған дейін де бірнеше рет түрлі экологиялық шаралар ұйымдастырылып келген болатын.
Сарыағаш ауданында мұндай бастамалар алдағы уақытта да жалғасын табады. Аудан әкімдігінің бастамасымен әр апта сайын сенбіліктер өткізу жоспарланып отыр. Сонымен қатар, «Жасыл белдеу», «Эко-бақ» және «Таза ауыл» секілді жобалар арқылы ауылдық округтерде абаттандыру мен көгалдандыру жұмыстары күшейтілмек.
