Түркі мәдениеті мен мұрасын сақтау және дәріптеу мақсатында Түркістанда өткізілген II Халықаралық түркі әлемі сәулетшілері мен реставраторларының симпозиумы өз жұмысын қорытындылады. Маңызды ғылыми-тәжірибелік жиын Түркі мәдениеті және мұрасы қоры мен Түркістан облысы әкімдігінің бірлесіп ұйымдастыруымен өтті.
Симпозиумға Түркия, Әзербайжан, Өзбекстан, Қырғызстан, Мажарстан және Қазақстан елдерінен келген жетекші ғалымдар, сала сарапшылары мен халықаралық ұйым өкілдері қатысты. Жиын барысында түркі өркениетінің сәулет ескерткіштері, олардың тарихи, мәдени маңызы, сондай-ақ оларды сақтау және қайта жаңғырту әдістері жан-жақты талқыланды.
Екі күнге жалғасқан шара «Түркі өркениетінің ескерткіштері: зерттеу, сақтау және реставрациялау әдістері» тақырыбын арқау етіп, тәжірибе алмасу мен ғылыми пікірталас алаңына айналды. Симпозиум аясында қатысушылар археология, реставрация және сәулет саласындағы заманауи тәсілдер, инновациялық технологиялар мен дәстүрлі әдістерді ұштастыру жолдарын талқылады.
Симпозиум бағдарламасы аясында қатысушыларға Түркістан өңірінің киелі нысандарын аралау мүмкіндігі ұсынылды. Ғылыми-танымдық сапар Арыстан баб кесенесіне зияратпен басталып, Отырар қалашығында жалғасын тапты. Шетелдік қонақтар ежелгі Отырардың мәдени қабаттарымен танысып, археологиялық жұмыстардың барысын бақылады. Түс ауа симпозиум делегаттары Қожа Ахмет Ясауи кесенесінде болды. Түркі руханиятының алтын діңгегіне айналған тарихи нысанмен танысу барысында қатысушылар еліміздің рухани мұрасын жоғары бағалады.
Сапар барысында қонақтар қазақ халқының бай тарихы мен мәдениетінен сыр шертетін салт-дәстүрлерге де куә болды. Киелі өңірдегі рухани мұралар мен тарихи жәдігерлер, сәулет ескерткіштері шетелдік сарапшылар тарапынан жоғары бағаға ие болды. Олар Түркістан қаласының көне мен жаңаны үйлестірген қазіргі келбеті мен рухани-ағартушылық бағыттағы дамуын ерекше атап өтті.
Симпозиум соңында қатысушылар ғылыми ортада өзара ынтымақтастықты арттыруға, бірлескен зерттеу жобаларын жүргізуге, реставрациялық тәжірибемен алмасуға ниетті екендіктерін білдіріп, ортақ декларация қабылдады.
Мұндай халықаралық форматтағы іс-шаралар – Түркістанның түркі әлеміндегі тарихи, мәдени және рухани рөлін күшейтіп қана қоймай, ғылыми қауымдастықтар арасындағы байланысты тереңдетуге де ықпал ететіні сөзсіз. Облыс әкімдігі тарапынан болашақта да осындай жиындарды тұрақты түрде өткізу, түркі мұраларын бірлесіп зерттеу және сақтау жұмыстары жалғаса бермек.
