Шомылу маусымы қарсаңында Шардара ауданында судағы қауіпсіздікті қамтамасыз ету мақсатында кешенді түсіндіру және алдын алу жұмыстары қарқынды жүргізілуде. Бұл бағыттағы жұмыстар аудан әкімінің қаулысына сәйкес құрылып, аудандық Төтенше жағдайлар бөлімінің үйлестіруімен іске асырылуда.
Атап айтқанда, Шардара су қоймасы жағалауындағы демалыс орындарының кәсіпкерлеріне, демалушылар мен балық аулаушыларға судағы қауіпсіздік талаптары жөнінде үгіт-насихат жұмыстары тұрақты түрде жүргізілуде. Түсіндіру жұмыстары рейдтер мен патрульдеу кезінде, сондай-ақ арнайы жиналыстар барысында өткізіліп отыр.
Бүгінгі таңда атқарылған жұмыстар нәтижесі мынадай:
-
Су айдындарында қауіпсіздік ережелерін бұзған, тыйым салынған орындарда шомылған немесе балаларды қараусыз қалдырған 12 азаматқа ҚР ӘҚБтК-нің 412-бабына сәйкес әкімшілік айыппұл салынды;
-
Кәсіпкерлерден суға шомылу маусымына дайындық аясында су астын тазалау және құтқарушыларды оқыту бойынша 7 өтініш қабылданып, нәтижесінде 11 құтқарушы дайындалып, арнайы құжаттары табысталды. Сонымен қатар 3 демалыс аймағында түбін тазалау жұмыстары жүргізілді;
-
Кәсіпкерлерге шомылуға рұқсат етілген орындарда қауіпсіздік шараларын ұйымдастыру бойынша «Су айдындарындағы қауіпсіздік қағидаларын бекіту туралы» ҚР ІІМ-нің 2015 жылғы 19 қаңтардағы №34 бұйрығына сәйкес талаптар түсіндіріліп, тиісті ілеспе хаттар табысталды;
-
Бұйрық талаптарына сәйкес шомылу орындарында 50 адамға 1 киім ауыстыруға арналған кабина мен дәретхана, сондай-ақ қажетті шезлонгтар, шатырлар мен тенттер орнатылуы тиіс екені ескертілді;
-
Рейд барысында кәсіпкерлер мен тұрғындарға қосымша қауіпсіздік талаптарын сақтау жөнінде де түсіндірме жұмыстары жүргізілді.
Құрметті Шардара ауданының тұрғындары мен қонақтары!
Су айдындарында демалу кезінде қауіпсіздік ережелерін қатаң сақтауларыңызды сұраймыз.
Су қауіпсіздігі қағидаларын бұзу ҚР Әкімшілік құқық бұзушылық туралы кодекстің 412-бабына сәйкес әкімшілік жауапкершілікке әкеліп соғатынын ескертеміз!
