ҚМА БҚО бойынша департаменті қаржы пирамидасын ұйымдастыру белгілері бойынша сотқа дейінгі тергеуді бастады, деп хабарлайды turkistanzaman BAQ.KZ тілшісі.
“WhatsApp” және “Telegram” мессенджерлері арқылы азаматтардың ақшалай қаражатын тарта отырып, “BINCLOUD” қаржы пирамидасы ұйымдастырылғаны анықталды. “BINCLOUD” бағдарламасына сәйкес жеке тұлғалар белгілі бір қаражатқа виртуалды майнинг жабдығын жалға алады, одан күн сайын салынған соманың 5-6% мөлшерінде инвестициялық кіріс алады, – деп хабарлады ҚР Қаржылық мониторинг агенттігінің ресми өкілі Әлібек Әбділов.
Оның айтуынша, клиенттерден кіріс қаражатын шығару кезінде қаржы пирамидасын ұйымдастырушылардың пайдасына жалпы қаражаттың 16% ұсталады.
Айта кету керек, пирамиданың басты міндеті – жаңа қатысушыларды тарту. Әдетте, пирамида құрылтайшысы айтарлықтай ақша қаражатын жинап, төлемдерді тоқтатады және барлық ақшамен жоғалады. Егер сіз “BINCLOUD” бағдарламасына қатысып, зардап шексеңіз, ҚМА аумақтық департаменттеріне немесе сенім телефоны арқылы хабарласуыңызды сұраймыз, – деді ол.
