Бейнежазбаларды тексеру барысында тестілеуде алаяқтыққа барған 19 талапкердің нәтижесі жойылды,-деп хабарлайды TurkistanZaman ақпараттық порталы BAQ.KZ-ке сілтеме жасай отырып.
Ұлттық тестілеу орталығы тестілеуді тапсыру кезінде заңбұзушылққа барған талапкерлер жайлы мәлімдеме жасады. Заңбұзушылықтар қатарына бөгде тұлғаларды анықтау, тыйым салынған заттарды алып кіруге талпыну және оларды пайдалану жатады.
Заңбұзушылық байқалып, ереже бұзылған жағдайда ақпарат автоматты түрде, орталық министрлігінің келісімінсіз, одан әрі қарастырылу үшін құқық қорғау органдарына тапсырылады.
«Осы ретте ҰТО оқуға түсушілердің білім алған мектебі, оның ішінде олардың ата-аналары туралы мәліметтерді анықтамайды. Бұл ҰБТ өткізу ережелеріне өзгерістер енгізілгеннен кейін екі жылдан бері жүзеге асырылып келе жатқан маңызды жұмыс», – делінген хабарламада.
Биыл бейнежазбаларды тексеру барысында 19 талапкердің нәтижесі жойылып отыр.
Айта кетейік, аталған норманы қабылдағаннан кейін, өткен жылы да заңбұзған талапкерлердің тағайындалып қойған гранттары жоққа шығарылған еді.
Гранттар тағайындалып болғаннан кейін де талапкерлерді тексеру жұмыстары жалғаса береді. Бірінше кезекте 100-ден аса балл жинаған түлектердің бейнежазбалары қаралады. Қалған талапкерлердің тестілеуді тапсыру барысы екінші кезекте тексеріледі.
