1 қазаннан бастап елімізде республикалық маңызға ие 25 мың шақырым жолдың тең жартысы, яғни, 11 мың шақырымы ақылы болмақ. Бұл туралы «Қазавтожол» мекемесіндегілер ресми мәлімдеді. Алайда ақпарат құлақтарына жете салысымен жүк көлік жүргізушілері бұған үдере қарсы шықты. Неліктен? Мәселені әріптесіміз Әлия Мұхтарқызы зерттеп көрді.
Түркістандық Жәнібек Дүйсенов – ауыр жүк көлігі жүргізушісі. Қаншама жылдан бері қала арасында азық-түлік тасып жүріп, жол бейнетін әбден көрген ол: «Тақтайдай тегіс болса бір сәрі, кедір-бұдыр, ойлы шұқыр сапасы сын көтермейтін тасжолға не үшін ақы төлеуіміз керек?», – деп күйіп-піседі ол.
Жәнібек ДҮЙСЕНОВ, ауыр жүк көлік жүргізушісі:
«Жолдың ақылы болуына қарсымыз. 25 теңге деген қайдан шыққан? Мына тұрған Оралға барып келу үшін 150 мың теңге төлейді екенбіз. Біз жолға шығармақ түгілі ондай ақшаны әлі үйімізге де алып келіп көрмеппіз»
Ақылы жолдары тізімі:
Щучинск — Көкшетау, Шымкент — Өзбекстан шекарасы,
Шымкент — Тараз, Шымкент — Қызылорда,
Тараз — Қайнар, Нұр-Сұлтан — Павлодар, Қапшағай — Талдықорған бағыттары.
Тариф сол бұрынғыша:
жеңіл көліктер әр шақырымға – 1 теңге,
ал ауыр жүк көліктері – 5 тен 25 теңгеге дейін.
Елімізде 2013 жылдан бастап Нұр-сұлтан – Шучинск жолы ақылы жүйеге көшкен болатын. Ал 2019 жылы Нұрсұлтан – Теміртау, Алматы – Қапшағай. Алматы – Қорғас тас жолдары да ақылы болған. «Нұрлы жол» бағдарламасына сәйкес, 2025 жылға дейін 11 мың шақырым ақылы болуы керек. Мамандар түскен ақшаның ешқайда кетпейтінін, қайта сол жолды күтіп ұстауға жұмсалатынын айтады. Әйтпесе, мемлекеттен бөлінетін ақша тіпті мардымсыз болса керек.
Диас Ахметшәріп,«Қазавтожол» АҚ баспасөз қызметінің жетекшісі:
«Нұрлы жол» бағдарламасына сәйкес, 11 мың шақырымды ақылы қылмақпыз. Себебі содан түскен қаражат жолды күтіп ұстауға жұмсалады. Әйтпесе, бүгінге дейін мемлекеттен ақша тек жолды салуға ғана бөлініп келді, ал оны күтіп ұстауға мүлдем қаражат қарастырылмаған десе болғандай. Сол үшін біз осындай амалға көштік»
Түйін: Компания өкілдерінің айтуынша, ақылы жолдар қажетті құралдармен жабдықталған. Белгіленген жол бөліктері 1 қазанда сынақ режимінде жұмыс бастайды. Жаңа ақылы жолдарда төлем қабылдау әдісі өзгереді. Шлагбаумдар алынып тасталады. Жүргізушілер смартфондағы қосымшаларды пайдаланып немесе RFID-таңба арқылы төлем жасай береді.
