Қарағанды облысының Шахтинск қаласында өздерін курьер ретінде таныстырып, адамдарды алдап келген қылмыстық топ ұсталды, деп хабарлайды Turkistanzaman ҚазАқпаратқа сілтеме жасап.
Шахтинск қаласының полицейлері қарапайым азаматтардың атына несие рәсімдеген алаяқтар тобын ұстады. Схема бойынша үш ер адам өздерін жолдама жеткізу қызметінің курьері ретінде таныстырып, адамдарға тапсырыс бойынша хат келгенін хабарлаған. Алайда ол хатты алу үшін жеке куәлікті көрсетуді және оны суретке түсіру керектігін айтқан. Кейін анықталғандай, олар адамдардың телефонына банк қосымшасын орнатып, несие рәсімдеген. Алған ақшаны өз шоттарына аударып отырған.
Осы схема құрбандарының бірі 2 тамызда Қарағанды облысы Шахтинск қаласының полиция бөліміне жүгінген. 60 жастағы әйел белгісіз біреулер оның атына 750 мың теңге несие рәсімдегенін хабарлады.
«Белгілі болғандай, жәбірленуші саяжай қоғамдарының бірінде күзетші болып жұмыс істейді. 14 шілде күні сағат 14.00-де бақылау-өткізу пунктіне өздерін курьерміз деп таныстырған үш адам келген. Олар әйелдің атына хат келді деп мәлімдеген. Бірақ оны алу үшін ресми процедураны орындау керектігін айтқан. Курьерлер жәбірленушінің ұялы телефонын сұрап, әйелді суретке түсіріп, ұялы телефонды қайтарып берген. Жәбірленуші бұл ретте белгісіз біреулер оның телефонына банктердің бірінің мобильдік қосымшасын орнатып, ол арқылы 750 мың теңгеге несие ресімдегенін білмей қалған. Бұл туралы әйел қаржы мекемесінен тиісті жарна енгізу қажеттігі туралы SMS-хабарлама келген кезде ғана білген», — делінген Қарағанды облысы Полиция департаментінің мәліметінде.
Кейін осы «курьерлер» Шахтинск қаласының маңындағы кенттердің бірінде тұратын ер адамды алдаған. Тура сол схема бойынша әрекет еткен топ, жәбірленушіге тапсырыс хатын беру сылтауымен оны суретке түсіріп, банк қосымшасын орнатып, 6 млн теңгеге несие рәсімдеген.
«9 қыркүйекте жедел-іздестіру шаралары барысында криминалдық полиция қызметкерлері күдіктілерді – 23, 25 және 35 жастағы үш ер адамды анықтады. Олар өз кінәсін мойындады. Полицейлер күдіктілердің осындай 8 қылмысқа қатысы барын дәлелдеді», — деді ведомстводан.
Қазіргі уақытта ҚР Қылмыстық кодексінің 190-бабы «Алаяқтық» бойынша сотқа дейінгі тергеу жүргізіліп жатыр. Күдіктілер уақытша ұстау изоляторына қамалды.
