Ұлттық «Қазақстан мұғалімі» байқауының 10 финалисті «Әлем мұғалімі» премиясына ұсынылатын болады,-деп хабарлайды TurkistanZaman ақпараттық порталы Tengrinews.kz-ке сілтеме жасай отырып.
Бұл премия халықаралық Global Teacher Prize жобасының бір бөлігі болып саналатын, жүлде қоры 1 миллион теңгені құрайтын Нобель сыйлығының аналогы ретінде танылған. Аталмыш сыйды әлемдегі мұғалімдердің мәртебесін көтеру мақсатында Верке қоры тағайындап отыр.
«Қазақстан мұғалімі» ұлттық байқауы қатарынан үшінші жыл өткізілуде. Байқауға еліміздің кез келген аймағынан кемінде үш жыл жұмыс өтілі бар мамандар қатыса алады. Жобаға ұсыныс беру мұғалімнің тарапынан ерікті түрде өтеді.
Байқау жеңімпазы 10 000 АҚШ доллары көлемінде ақшалай сыйлыққа ие болады. Қалған 9 финалистке түрлі номинациялар мен өзге де сыйлықтар берілетін болады.
Сондай ақ, финалда бой көрсеткен барша мұғалімдер әлемдік бәсекеде бағын сынайды. Әлемдегі ең үздік мұғалім атағын алған маман 1 миллион АҚШ долларын қанжығаламақ.
Сонымен қатар, «Қазақстан мұғалімі» ұлттық байқауының аясында ауылдық 30 мектепке әлеуметтік жобаларды жүзеге асыру үшін 1 миллион теңгеге дейін грант беріледі. Байқаудың тағы да бір бағыты- «Болашақтың мұғалімі» жобасы. Жоба аясында педагогикалық кадрларды даярлайтын, 10 жоғары оқу орнының 10 үздік студенті іріктеліп отыр.
Айта кетейік, байқауға қатысу үшін Teacherprize.kz. ресми сайтына өтінім жіберу керек. Өтініштер 2021 жылдың 15 тамызына дейін қабылданады.
