Шымкент әкімдігі бүтін бір шағын ауданды бұзып тастамақ. Онда 1000-ға жуық жер үй бар. Бұған келіспеген “Тұран” шағын ауданының тұрғындары әкімдік алдына жиналды. Наразылық білдірген ел жаңа үйге енді ғана көшкен едік деп ашынады.
Тұрғындар айқайы: “Қашан халықты ойлайсыздар?”, “Сол компанияңызға Тараз бен Шымкенттің ортасындағы жерді беріңіз. До конца соқсын Таразға дейін. Зачем халық соғып қойған нәрсеге жабыса береді?”
Жиналған бұл жұрт Шымкенттегі Тұран шағын ауданының тұрғындары. Өз үйлерінің сүрілетінін олар сәулет және жер қатынастары басқармасының парақшасынан көрген. Осыны айтып, қала әкімі Мұрат Әйтеновтің қабылдауына келді.
Тұрғындар сөзінше ауыз су мен газды өздері жүргізіп алған. Алайда жұрттың бұл қуанышы ұзаққа созылған жоқ. 10 жылдан кейін пайда болған әкімдік бұл жерге көпқабатты үй тұрғызуды ұйғарып отыр.
Жорабек Жаңабаев – Шымкент қаласының тұрғыны:
“Инфроструктура дайын да бұл жерде. Газы бар, светі бар, конализация, су бар. Соған келіп, үлкен үйлерді соққысы келеді. Жерлерді сатып алып, бала шағамызға қалдырайын деп едік. Қазір қарап отырсақ, бала шаға түгілі өзіміз зорға соққан үйімізден айрылып қаламыз ба деп отырмыз”
Алайда, қала әкімі мұны 2030 жылға жасалған жоспар екенін айтып шықты.
Мұрат Әйтенов – Шымкент қаласының әкімі:
“Заңға сәйкес бәріміз жиналамыз. Сол кезде қағазбен бекітіледі. Барлығыңыз сол кезде дауыс бересіздер. Дауыс бергенде бекітіледі. Ол ұсыныс қой. Егер де келіспесек ол болмайды”.
Қала әкімінің сөзінше Шымкентте халық саны көбейіп бара жатқан соң, бас жоспарды өзгертпек болған. Алайда, бұған тұрғындар келіспесе, сол қалпында қалдырамыз дейді.
