Түркістан облысында табиғи апаттан зардап шеккен жұрт туыстарының үйін паналауға мәжбүр. Өйткені Сарыағаш және Қазығұрт аудандарында жауынның зардабынан 41 үйге су кіріп, жарамсыз болып қалған. Қазір бұл өңірлерде арнайы құрылған комиссия шығын көлемін есептеп жатыр. Ал табиғи апаттан зардап шеккендерге қоғамдық ұйымдар көмектесуде.
Табиғи апаттан Заңғар, Сарапхана, Қызылқия, Қарабау және Жіңішке ауылдары су астында қалған еді. Қазір өңір тұрғындары бір-біріне көмектесіп, жағдайды реттеуге атсалысып жатыр. Ал бірнеше отбасы дүние мүлкін көшіріп әлек. Себебі баспаналарын сел шайып, жарамсыз деп танылған. Ал әкімдік уақытша баспана тауып береміз деп уәде етіпті.
Бақытгүл Мырзабекова – Қазығұрт ауданы Заңғар ауылының тұрғыны:
«Су шылқылдап, мынау фундаментке дейін жетті. Содан жібіп астындағы фундамент, қолмен өрілген қыш қой. Сол трещина беріп, мынау үй құлайын деп тұр. Енді бұл жерде тұру мүмкін емес. Басқа жерден үй салып, басқа учаскеге үй салып беруін сұранамын енді».
Белсенділер қорасы мен баспанасын су басқан ауыл тұрғындарының тізімдерін алған. Содан соң оларға аса қажетті гигиеналық заттар мен қаржылай қолдау көрсетілмек.
Мәлика Жүсіпова – Белсенді:
Қазір біз енді төсеніш алып келіп отырмыз. Гигенический набор, киімдерін алып келіп жатырмыз. Соны таратып, көмегімізді беріп шығамыз.
«Су басқан аумақты ретке келтіруге облыстық төтенше жағдайлар департаментінің және жергілікті атқарушы органдардың 100-ден аса қызметкері жұмылдырылған. Арнайы құрылған комиссия Сарыағаш пен Қазығұрт аудандарында 41 үйге су кіргенін анықтаған».
Мақсат Зайтов — Қақпақ ауылдық округінің әкімі:
«Қазіргі таңда ауылдың белсенді жастарымен, ауыл тұрғындарымен қазіргі үйіндегі қалып кеткен заттарын шығарып, арнайы үй тауып, көшіру жұмыстарымен айналысып жатырмыз. Арнайы жұмысшы топ құрылып, акт түзіп, үйге қандай зиян шығындар келді, солардың барлығын тізімімен анықтап, біз жаңағы ауданға ұсыныс беріп жатырмыз».
Жалпы тасқын судан 370 бас мал тұншығып өлген. Облыстық әкімдіктегілер құлаған баспана мен қираған қораны жөндеу үшін қаржы бөлінеді. Ал өлген малдың өтемақысы өтеледі,-деді.
