Түркістан облысы, Түлкібас ауданында екі қораның өртеніп кетуіне байланысты қылмыстық іс қозғалды. Бұл туралы өңірдің Полиция департаменті ресми ақпарат таратты, деп хабарлайды ҚазАқпарат.
Облыстық ПД баспасөз қызметінің мәліметінше, оқиға орнына Түлкібас АПБ-нің 10-нан астам полиция қызметкері мен прокуратура өкілдері шыққан.
«Қазіргі уақытта Түлкібас АПБ-мен ҚК 202-бабы «Бөтеннің мүлкін қасақана жою немесе бүлдіру« бойынша сотқа дейінгі тергеу амалдары жүргізілуде. Сараптама тағайындалды. Бүгінде орын алған оқыс оқиғаны анықтап, қылмысты ашу мақсатында тәжірибелі полиция қызметкерлерінен жедел-тергеу тобы құрылды. Олармен өрттің нақты себептерін айқындау бойынша іс-шаралар кешені жүргізілуде», – делінген хабарламада.
Айта кетейік, бұған дейін Тастұмсық ауылында екі сарай өртеніп, шаруаның қысқа дайындаған мал азығы түгелімен жанып кеткенін хабарлаған болатынбыз. Ал, шаруалар болса тілсіз жаудан 40 млн теңгедей шығынға батқанын айтып отыр. Олар сондай-ақ, екі қораны да көрші ауылдың бір тұрғыны өртеп жіберді деген сенімде. Алайда бұл болжамды енді тәртіп сақшылары анықтайтын болады.
