Туризмді дамыту ғимарат салумен шектелмейді. Бұлай дейтініміз, тиісті салаға бөлінген қаражат 100 млрд теңгеден асып кетсе, келушілер саны 100 мыңға да жетпейді. Жыл басынан бері облысқа бар болғаны 94 мың адам келген. Оның ішінде шетелдік туристер үлесі тіптен аз. Жылына 870 қана. Түйіткілді тарқатар амал қайсы? Толығырақ тілшіміз Қасым Хабибуллаұлының материалында.
2019 жылы Түркістан облысының туристік әлеуетін арттыруға 8 млрд теңге бөлініпті. Ал былтыр бұл қаржы еселеніп, 128 млрд теңгеге жеткен. Биыл қаралғаны ақша да аз емес. 80 млрд теңгенің шамасында. Бұл Қазақстандағы қалған өңірлердің барлығына бөлінген қаражатпен бірдей. Әйтсе де туристердің келу көрсеткіші көңіл көншітпейді.
Қазақстандық туристерді тарту көрсеткіші бойынша Алматы қаласы көш бастап тұр. Мұнда 2021 жылдың 9 айында 447 мыңнан астам адам келген. Екінші орындағы Нұр-сұлтан қаласына – 289 мың, Алматы облысына – 165 мың турист келген. Бұл көрсеткіш бойынша, Түркістан облысы 94 мың адаммен 9 орында жайғасқан. Сонымен қатар рухани астанаға 870 қана шетелдік саяхаттап келіпті.
Тиісті сала өкілдері 80 млрд. теңгенің басым бөлігі туристік нысандардың құрылысына бағытталғанын айтады. Олардың арасында Керуен сарайы, Қасқасу шаңғы базасы сынды бірнеше ірі нысан бар екен. Сонымен қатар мұндай жобалардан 1-2 жылдың ішінде үлкен көрсеткішті күту қателік, – дейді олар. Сонымен қатар, қонақүйлердің жетіспеушілігі турист санының кемшін болуына сеп болып отырса керек.
Нұрдәулет Медеуов, Түркістан облыстық туризм басқармасының бөлім басшысы:
«Алматы қаласында 313 қонақ үй болса, Түркістан облысында олардың саны –188. Яғни орналастыру орындары бар. Екеуін салыстырғанда, категория рөл ойнайды. Алматыда категориясы жоғары қонақ үйлер көп. Пайыздық есепке салғанда Алматы қаласы 21,9 пайыз көрсетсе, біздікі – 20, 4»
Дегенмен соңғы жылдарда туристер саны біршама өскен. 2019 жылы бар болғаны 60 мың ғана адам келген екен. Араға 2 жыл салып көрсеткіш 30 мыңға артып отыр, – дейді мамандар. Ал сарапшылар ауыз толтырып айтарлық көрсеткішке жету үшін сала мамандары бірігіп жұмыс атқару керек. Шетелдік тәжірибе бойынша туроператорларды көптеп тартсақ, оң нәтижеге қол жеткіземіз», – дейді олар.
Мая Ақәділова, сарапшы:
«Біріншіден бізде тур операторлар жетіспейді. «Керуен сарай» енді ашылған кезде әлеуметтік желі арқылы жарнамасына қызыққан адамдар мыңдап келіп жатты. Алайда тур операторлар болмағандықтан, оларды ұстап қала алмадық»
Әлемге танымал отандық жұлдыздар да туристік әлеуетті арттыруға үлкен ықпал етеді. Сарапшы осылай дейді. Олардың қатысуымен іс-шара өткізіп, әлеуметтік желі арқылы жарнамалау да тиімді тетік екен.
