Мемлекет басшысы Сеулдағы Кибер университеттің аумағында ашылған ұлы Абай бюстінің ашылуына қатысты,-деп хабарлайды TurkistanZaman ақпарат агенттігі Ақорданың ресми сайтына сілтеме жасай отырып.
«Сеул төрінде қазақ халқының ұлы перзенті, ақын Абай Құнанбайұлының бюсті орнатылды. Бұл – корей бауырларымыздың қазақ халқына деген зор құрметінің белгісі», – деді Қазақстан Президенті.
Бюсттің жобасы елімізде дайындалып, тұтас мүсіні Кореяда қоладан құйылды. Аталған игі бастаманың Қазақстан мен Корея Республикасының достығын нығайта түсетіні сөзсіз. Абай бюстінің білім ордасының ауданында орналасуы да бекер емес.
«Абай – ұлы ақын ғана емес, кемеңгер ойшыл, әйгілі ағартушы. Сондықтан, Абайға арналған бюсттің білім ордасына қойылуы орынды шешім екені сөзсіз. Мұның символдық мән-маңызы айрықша. Ол жұртты ғылым игеруге, білімдар болуға үндеді. Жаңашылдық пен жасампаздықты дәріптеді. Абай мұрасы – біздің елімізге ғана емес, барша адамзатқа ортақ құндылық»,- деп атап өтті ел президенті.
